Shillong, Jylliew 23, 2026: U Myntri Rangbah ka Jylla Conrad K Snagma mynta ka sngi ula pyniaid ia ka jingialang bishar kam kaba bniah bha jong ka Tnad Education hapoh State Guest House, Taraghar, Shillong, ban bishar ia ki kam kiba dang iaid kiba thmu ban pynbha ia ki jingtei jong ki skul, ki jingmih naka pule dangle, ka bha ka miat ki khynnah pule bad ka jinglah treikam ka Jylla ha ka Performance Grading Index (PGI)
Ha ka jingialang, ki Ophisar kila ai ia ka jingbatai kaba bniah halor ki nongrim jong ka Meghalaya PGI bad batai ia ki buit treikam ban pynjanai ia ka jingtreikam lyngba ka jingai jingtip ba kham bha, jingpynbiang ia ki data, ki jingbud ryntih bad ka jingiarap bala buh da ka thong ha ka kyrdan jong ki skul. U Myntri Rangbah ula bishar ia ki jingduna hala ki jong ki jong ki nongrim ai kyrdan bad bthah ia ka Tnad ba kan pynkhreh ia ki plan ba kyrpang kiba lah ban pyntreikam ha ki skul khnang ban weng ia ki jingduna ha ki jingeh, ki jingpyniaid bad ka rukom ai jingtip.
U Myntri Rangbah ula ban jur ba ka kyrdan ba ioh ka Meghalaya kam shym la pyni ia kaba dei hok na ki kam bala leh ha ka kam pule dangle bad pynpaw ba bun ki jingduna ki mih na ka rukom ai jingtip bad ki jingduna ka jingpeit thuh ha ka jaka jong ka jingbym don ki sienjam bala shim. Ula bthah ia ka Tnad ba kan shim ia ka lad peit thuh kaba la pynbeit ryntih bad ban pyndonkam kham bha ia ki technology bad ki jingkhein jingdiah ban ithuh ia ki kam kiba donkam ban hap ban leh eiei.
Haba bishar ia ki nongrim ba iadei bad ki jingtei, u Myntri Rangbah ula ban jur ia ka jingdonkam ban pynkhlain ia ka jing ioh ia ki ICT facilities, smart classroom, science laboratory, jaka pule, library, kamra shna jingshna kti bad thoh dur, ki jaka pynlang umslap bad ki jingpynbiang um dih ha ki skul. Ula bthah ia ki Ophisar ba kin ithuh ia ki sienjam kiba duna ka jinglut kiba lah ban iarap ia ki skul ba kin kot ia ki kyndon bala buh haba pynthikna ia ka jaka pule ban long kaba sngewtynnad.
Ka jingialang kala bishar ruh ia ki lad ki lynti ban pynkhlain ia ka pule dangle kaba kynthup lang. Ki Ophisar kila pynsngew ia ki jingthmu ban pynbiang ia ki jingdonkam na ka bynta ka Children With Special Needs (CWSN), kynthup ki ramp, ki painkhana ba ki lah ban leit, ki technology bad ki prokram ai jinghikai ia ki nonghikai. U Myntri Rangbah ula bthah ia ka Tnad ban pynthikna ba ki skul kin ioh ia ka jingkyrshan ban pyndep ia ki kyndon ba lah buh bad ba ki khynnah kiba don jingduna dkhot met kin ioh ia ki jingiarap kaba biang.
La iakren bniah ruh halor ka koit ka khiah ki khynnah pule, ka jingbam tei met bad ki kam ba iadei bad ka bha ka miat. Ki Ophisar kila pynsngew ia ki jingpyrshang ban pynkhlain ia ka jingkhmih bniah ia ka koit ka khiah ba man u snem, ki prokram ban batai ia ki jingbam tei met, ka jingiasyllok ia ki kam ki jam bad ka jingpynsngewthuh halor ka jingshngain ki kor internet ha ki skul. U Myntri Rangbah ula ban jur ia ka jingpynrung lang ia ka koit ka khiah, ka bam tei met bad ki jingtuklar ha ka pule dangle ban pynjanai ia ka bha ka miat ki khynnah skul bad ki jingmih na ki jingpule.
Ka jingialang kala bishar ruh ia ki buit treikam ban pynioh ia ki painkhana kiba bha bad ka jingioh ia ka umbam umdih ha ki skul. U Myntri Rangbah ula bthah ia ka Tnad ba kan leit lum jingtip na man ki skul bad ban buh thup ia ki jaka pule kat kum ki jingdonkam jong ki, kynthup ka jingsam umbam umdih, ka jaka buh tiar, ka jaka pynlang um slap bad kiwei kiwei.
Ki Ophisar kila batai ruh ia u Myntri Rangbah halor ki jingthmu ban pynkhlain ia ka Parent-Teacher Meeting (PTM) bad ka jingiashimbynta ki shnong ki thaw ha ka pule dangle. U Myntri Rangbah ula pynpaw ba ka jingiatreilang kaba khlain hapdeng ki skul bad ki kmie kpa ka long kaba kongsan bha ban pynkhlain ia ka jingmih na ki jingpule bad pynshlur ia ka tnad ba kan pynsngewthuh bha haba iadei bad ka jingpyniadon bynta ki kmie kpa ha ka pule dangle ki khun.
Haba pynwai ia ka jingialang, u Myntri Rangbah ula bthah ia ka Tnad ba kan pynkhreh ia ka lynti treikam kaba bniah kaba don bad ka jingbuh pork aba shai, ki jingdonkam song pisa bad ki lad peit thuh ban kyntiew ia ka PGI performance, pynkhain ia ki jingtei jong ki skul, ban kyntiew ia ka bha ka miat ki khynnah pule bad pynjanai ia ka jingmih na ki jingpule.
Sa peit ruh
