Ther U Dr. Bom Ïa Kito Kiba Ju Kynnoh Shah Theid, Tang Lada Ïaroh Ïa Ka Sorkar Ne Ïa Ka NPP

Mawkyrwat, Jylliew 23: Ha ka jingïalap election kaba la long mynta ka sngi ha Mawkyrwat ban pan jingkyrshan ïa u Dr. DRL Nonglait  kum u Kyrtong MP naka Party NPP, u MLA ka Umsning Constituency, u Dr. Celestine Lyngdoh, u la pynpaw ba ha kine ki sngi haba ki nongïalam ka NPP ki leit ban ïalap election bad ban pynshai sha ki paidbah ïa ki kam kiba ka Sorkar ka la leh, hynrei ha ki social media la ju kynnoh ba kino kino kiba ïaroh ne kyrshan ïa ka Sorkar bad ïa ka NPP ki dei kiba la shah thied da ka pisa na ka Sorkar.

Haba kren ha katei ka jingïalang, u Dr. Celestine Lyngdoh u la ong ba ka jingkren jong u ban kyrshan ïa ka Sorkar kam dei namar ba u la shah thied, hynrei ka long tang ban pynshai sha ki paidbah ïa ki kam pynroi kiba ka Sorkar ka la pyntreikam. U la ong ruh ba kam dei kaba dei ban ñiew ïa baroh kiba ym kyrshan ïa kawei ka party kum ki nongshun, namar kata ka long kaba bakla eh.

U Dr. Celestine u la ong ba man la ka party ka don ka hok ban ïalap election bad ban pynpaw ïa la ki jingsngew, hynrei, u la ban jur ba ka NPP kam ju khot ïa kino kino ki party ki bym kyrshan kum ki nongshun, namar ba ka party ka ïeng skhem halor ki nongrim jong ka.

Sa pule ruh: Nga la ïoh jinghikai shibun naki Nong Mawkyrwat ha ka jingshakri kum u Principal ka Sngap Syiem College: Dr. Nonglait

U Dr. Celestine Lyngdoh u la kren ruh halor ka jingiehnoh kam u MDC ka VPP na Mawkyrwat naka kam kaba u bat kum u EM, ha kaba kane ka pyni ba don ki jingïapher jingmut hapoh katei ka party. U la ong ruh ba watla katei ka party ka kam ba ka trei ban pynïatylli ïa ka jaitbynriew, hynrei napdeng ki saw ngut ki MLA jong ka, la ju ïohi tang ar ngut kiba ju leit ïalap election, katba kiwei pat kim paw satia.

Shuh shuh u Dr. Celestine u la ong ba lada tang saw ngut ki MLA kim lah ban ïatylli hapdeng jong ki, kumno pat kin lah ban pynïatylli ïa ka jaitbynriew. U la kynnoh ruh ba ha kiba bun ki jingïalap election bad ha ki social media la ju ïohi ïa ka jingkynthoh bad jingïabeiñ briew. Kumta, u la kyntu ïa ki paidbah ba kin kyrshan ïa u Dr. DRL Nonglait, u kyrtong ka NPP, da kaba ong ba u dei u nongïalam uba ïeng skhem ha ki nongrim bad uba ym ju mlien ban kynthoh ne beiñ ïa kiwei.

Sa peit ruh