Ka kynhun ialehkai kriket ka ri India sa shisien pat ka la lah ban thaw histori biang da kaba jop bad rah ia ka nam lahduh jong ka rynsan ialehkai ka T20 World Cup 2024 kata hadien ki 17 snem, da kaba pynliem noh ia ka kynhun jong ka South Africa da 7 run ha ka jingiakhun kaba shongshit bad kaba ia khaid bha, kaba la long ha ka madan ialehkai jong ka Kensington Oval, Barbados.
Ha kane ka jingiakhun ia ka phainal jong kane ka lympung ialehkai kriket kaba heh ha ka ri, ka India ka la lah ban khur biang ia ka jingjop bad long kum ka lahduh da kaba pynliem ia ka kynhun jong ka South Africa da 7 run, kata hadien ba ka kynhun jong ka India ka buh ia ka thong kaba long 176 run da kaba duh noh kumba 7 ngut ki nongtied hapoh ka 20 overs.
Haba beh ia katei ka thong ban khur ia ka namjop bad kum ka lahduh jong ka t20 World Cup, ka kynhun jong ka South Africa kam shem lah ban jam sha katei ka thong hadien ba ka la lah ban pynphai tang da 168 run bad duh noh 8 ngut ki nongtied hapoh ka 20 overs.
Lyngba kane jingjop bad ka nam lahduh ha ka T20 World Cup Cricket Tournament, ka Ri India ka la nang kiew ha ka jingkhein, ha ka thup kaba shakhmat jong ki lympung ialehkai kriket jong ka pyrthei hi baroh kawei.
