Nongpoh, Naitung 01: Ha ka kyrwoh kaba la phah da u Superintendent of Police ka Ri Bhoi District, la pyntip ba ha ka 01 u Jylliew ha ka por 10:30 baje eiei mynmiet, ki la don ki briew, kiba la wanrah sha Public Health Center (PHC) Byrnihat, ia uwei u rangbah uba don hapdeng ka jingshitom shitmet kaba jur, na bynta ban ioh ia ka jingshah sumar ha katei ka Hospital.
Haba la poi ha jaka sumar, utei u rangbah uba la shitom jur, ki Pulit ki la pynkit noh sha Civil Hospital Shillong, na bynta ban ioh ia ka jingsumar kaba kham biang, hynrei katba nangmih ki sngi, ka jingshitom utei u rangbah ka la nangjur bad dei ha ka 28 tarik u Jylliew, ba utei u rangbah u la khlad noh na sla pyrthei ha ka por 9:45 baje eiei mynmiet, kata ha ka por ba u dang don hapdeng ka jingshah sumar.
Ia utei u rangbah, la sumar ha Civil Hospital khlem da don kiba haiing hasem bad haba u la khlad noh na sla pyrthei, ki briew ka ain, haba ki la pyndep ia baroh ki jingdonkam, ki la buh noh ia ka met utei u rangbah sha jaka buh Metiap ha Civil Hospital, Shillong.
Naduh ka sngi ba utei u rangbah, u la khlad noh, ym pat don kino kino ki briew ne kiba haiing hasem, kiba la wan shakhmat ban kam ia katei ka metiap, nalorkata la ong ba utei u rangbah, u dei uba la tip kum u Bah Watson Kyndait, khun ka Kong Pyndap Kyndait na ka shnong Tuber Kmai Shnong, East Jaintia Hills District.
Utei u rangbah u don ia ka rynieng kaba 5 phut 5 inshi, uba pdeng met, uba met iong, u shniuh ba lyngkot bad uba don tmain.
Kumta na ka liang u SP ka Ri-Bhoi, u la kyntu ia kino kino ki briew kiba don jingtip shaphang utei u rangbah ne ia kiba haiing jong u, ba kin pyntip sha ka Police Control Room (PCR), Nongpoh, da kaba phun ha ki number 9856084514 bad 7005888649.
Sa peit ruh
