Khliehriat, Naitung 6: U Rangbah Shnong ka Tuberkmaishnong, East Jaiñtia Hills District, Bah Jiedlang Sana, ha ka sngi U Blei u la pyntip sha ki lad pathai khubor halor ka jingpynkhreh ïa ka lehniam Behdeiñkhlam Seiñ Raij Tuber, kaba yn pynlong naduh ka 14 haduh 17 tarik Naitung.
U Bah Jiedlang Sana u la ong ba ka Behdeiñkhlam Seiñ Raij Tuber ka dei ka lehniam kaba la rim bha bad kaba la ju long naduh ki por mynbarim ha ka jaka kaba la tip kum ka “Biar Blai Aitnar,” kaba long ruh ka jaka ba ki longshwa manshwa ki ju shna ïa ki tiar nar.
U la khot bad wer ïa ki paidbah na kylleng ban wan sakhi bad ïashim bynta ha kane ka lehniam kaba don jingïadei bad ka jingngeit bad ka kolshor tynrai jong ka Seiñ Raij.
U la ïathuh ruh ba ha ka sngi ba kongsan jong ka lehniam, yn wan shim bynta da u Myntri Rangbah ka Jylla, Bah Conrad K. Sangma, ryngkat bad u Symbud Myntri Rangbah, Bah Sniawbhalang Dhar, ki MDC, u MLA ka thaiñ, ki ophisar sorkar bad kiwei pat ki riew rangbah.
U la kyrpad ïa baroh kiba wan ban bud ïa ka jinglong ryntih bad jingïatreilang khnang ba ka lehniam kan long kaba ïaid beit ïaid ryntih bad kaba jop.
Ha kane ka lehniam, yn don kumba 65 haduh 70 tylli ki Rong bad Rot, kiba yn pyni da ki kynhun Seiñ Raij Shnong kiba wan na palat 30 tylli ki shnong Seiñ Raij, kiba pynpaw ïa ka sap bad ka kolshor tynrai jong ka thaiñ.
Haba kren halor ka leit ka wan paidbah, u la ong ba la pynkhreh ïa ki jaka pynïeng kali bapher bapher na ka bynta ki VIP bad ki paidbah. Yn pynbeit ruh da ki volunteer ban pynïaid ïa ka leit ka wan jong ki kali namar ka don lai tylli ki surok kiba pynïasoh bad ka National Highway. U la kyrpad ïa ki paidbah ban bud ïa ki jingbthah jong ki bor pynïaid kali.
U Bah Jiedlang Sana u la pynpaw ruh ïa ka jingsngewkhia halor ka jingeh kaba ki longïing ki sem ki ïakynduh hadien ka jingkhang tih dewïong ha East Jaiñtia Hills. U la ong ba mynshwa, ka jingim jong bun ki longïing ka shaniah bha ha ka kam tih dewïong, hynrei mynta ki la mad ïa ka jingeh ha ka kamai kajih.
Watla katta ruh, u la ong ba ka Behdeiñkhlam ka la bteng ban long wat ha ka por jingïakhun pyrshah ïa ka khlam COVID-19 bad ka jingïakhang shnong, namar ka dei ka bynta kaba kongsan jong ka niam bad ka kolshor jong ki paid Seiñ Raij.
Ha kaba kut, u la kyrpad ïa ka Sorkar ba kan wad ïa ki lad ki lynti ban pynbeit ïa ka kam tih dewïong katkum ka aiñ, khnang ba ki paidbah kin ïoh biang ïa ka lad kamai jakpoh bad ban pynbha ïa ka lawei pule jong ki khun ki kti.
Sa peit ruh
