Haba sdang ka Round-16 jong ka European Cup 2024, ka Italy kaba dei ruh ka ri kaba bat ia ka nam lahduh ha ka snem 2020, ka la hap ban phai thylli noh sha la iing, hadien ba ka la shah pynliem noh hakhmat ka Switzerland da 2-0.
Ka jingiakhun hapdeng ka Switzerland pyrshah ia ka Italy ka la long jingiakhun kaba iakhaid eh, khamtam eh ba ka Italy ka dei kata kynhun kaba khlain bad kaba don ia ki rangialehkai kiba kynsai bad kiba paw ha ka pyrthei.
Haba phai ha ka kylla step jong ka jingiakhun, ka Switzerland ka la lah lamkhmat ia ka jingiakhun lyngba ka kol kaba la thep da u Remo Freuler ha ka minit ba 37 bad ba ka Switzerland ka la lamkhmat ban pynkut noh ia ka kylla step 1-0.
Haba bteng ka kylla miet jong ka jingiakhun, mar ia sdang ka jingiakhun kata tang ha ka minit 46, ka Switzerland ka la ioh biang ia ka kabu ban thep kol, ia kaba la thep da u Ruben Vargas bad kaba la long kum tied da u tyrnem ia ki rangialehkai ka Italy.
Ki rangialehkai ka Italy, ki la pyrshang katlah kat iai ban pynphai ia kitei ki kol ba ki la shah thep, hynrei haduh ba kut ka jingiakhun, kim shym la lah ban pynphai bad kiba la hap ban pdiang ia ka rai rem hakhmat ka Switzerland bad ba kin hap song noh ia ki tiar ki tar ban leit phai iing noh.
Katba haba phai pat sha ka jingiakhun hapdeng ka Germany ka ri kaba la pynlong ia ka Euro Cup 2024 pyrshah ia ka Denmark, ka jingiakhun ha ka kylla step jong ka jingiakhun, ka la kut noh ha ka jingiakhaid kaba ym don kiba thep kol.
Haba bteng ka kylla miet jong ka jingiakhun, ka Germany ka la lah ban lamkhmat ia ka jingiakhun lyngba ka kol na u K. Havertz ha ka minit ba 53, uba la thep ha ka dur jong ka Penalty bad katto katne minit hadien katei ka kol, ka Germany ka la ioh biang ia ka kabu ban thep kol, ia kaba la thep da u J . Musiala ha ka minit ba 68 jong ka jingiakhun.
Lyngba katei ka namjop ha ka Round-16, ka Switzerland lem bad ka Germany, ki la pynthikna ialade ban rung sha ka Quater Final, ia kaba kin hap iakhun ia kawei pat ki kynhun kiban iakhun namjop ha ka Round-16.
Ka jingiakhun kaba mynta ka miet, kan long hapdeng ka England pyrshah ia ka Slovakia, ki ban iakhun ha ka por 9:30 baje mynmiet. Katba ka Spain pyrshah ia ka Georgia kin iakhun ha ka por 12:30 baje shiteng synnia.
