Nongpoh, Naitung 10: U Superintendent of Police ka Ri-Bhoi u la pyntip ba ha ka janmiet jong ka 5 tarik Naitung 2026, ki pulit ka Byrnihat Police Station ki la ïoh tam ïa ka metiap jong uwei u rangbah bym lah ban ithuh, kaba la thiah hapoh ka building barim jong ka Sales Tax ha Byrnihat Proper, hadien ba ki riew paidbah ki la pyntip sha ki pulit.
Katkum ka jingtohkit, la lap ba utei u briew u dei uba ym don ïing don sem bad uba don jingduna ha ka bor pyrkhat, uba ju leit ju wan bad shang kylleng ka thaiñ Byrnihat. Hadien kane, ki pulit ki la rah ïa ka met sha Nongpoh Civil Hospital, bad ha ka 6 tarik Naitung la pyndep ïa ka post-mortem examination ban tip ïa ka daw jong ka jingïap. Hadien ba la pyndep ïa ka jingtohkit paidbah, la buh noh ïa ka met ha ka jaka buh metiap jong ka Nongpoh Civil Hospital.
Ki pulit ki la pyntip ba utei u rangbah u don ka jingjrong kumba 5.3 phut, u dei uba kham raikhoh bad u phong ïa ka patlun lyngkot rong lieh.
Haduh mynta, ym pat don mano mano kiba wan ban kam ïa ka met. Kumta, ki pulit ki kyrpad ïa kino kino kiba lah ban ithuh ne don jingtip shaphang utei u briew ba kin sngewbha pyntip mardor sha ka Police Control Room ha u nombar 9856084514 khnang ba yn lah ban pyndep ïa ki jingdonkam katkum ka aiñ.
Sa peit ruh
