Kam dei shuh ka jingjia kaba thymmai, ha kaba bunsien ki nongtrei sorkar jong ki tnad treikam bapher bapher bad khamtam ha ki shnong Nongkyndong ki hap ban trei ne sah ha ki ïing kiba la jot la para bad ka daw ka long ba ka sorkar kam lah satia ban pynbit pynbiang katkum ka jingdonkam ki nongtrei sorkar.
Kawei na ka nuska kumba la lap da ki Nongthoh Khubor, ka dei ka jaka ap khyrdop ban khrong khajna jong ka sorkar lyngba ka tnad Forest kaba don ha Umsiang, ha kaba ki nongtrei ha katei ka tnad, ki hap ban pyndonkam ïa ka ophis kaba la jot bad ki jaka sah kiba la jot bad wat la katta ruh ki hap ban pyndep ïa la ka kamram ba la bynshed da ka sorkar lyngba ka tnad Forest.
Ïa kane la lap da ki Nongthoh Khubor ha ka jingleit jurip ïa katei ka jaka ba la buh ïa ka khyrdop khrong khajna ka tnad Forest ba hap ha ka shnong Umsiang, kaba don ha khappud bad ka jylla Assam bad ruh kaba dang hap hapoh ka Mawhati konstitwensi ha Ri Bhoi District.
Kumba la lap bad sakhi halor ka jinglong jingman katei ka ophis treikam ba la buh ïa ka khyrdop khrong khajna ka tnad Forest, ka long shisha kaba sngewsangsot, namar ki nongtrei sorkar ba la bynshet da ka sorkar ban peit ïa kitei ki kam khrong khajna bad kiwei kiwei, ki hap ban shong ban sah ha ka ophis ba la jot la pra, ba ka sorkar jylla lyngba ka tnad Forest kam lah satia ban maramot ne ban pynbha, bad ba ki nongrei ki hap ban shong ban sah ne treikam ha ka ïing kaba la jot la pei.
