Da ka jingpeitngor ka kynhun Border Security Force (BSF) jong ka 193 Battalion BSF Meghalaya mynta ka sngi U Blei, ki la ioh kem ia ki lai ngut ki nong Bangladesh, katba ki dang thmu ban rung tuh sha India lyngba ka khappud ba hap ha ka East Khasi Hills District jong ka jylla Meghalaya.
Kitei ki nong Bangladesh ba la ioh kem da ka kynhun BSF ki kynthup ia u Mohibur Rehman, 30 snem ka rta, u Kudus Miah, 25 snem ka rta (25 years), na ka Sunamganj District, bad u Mubarak Hossain, 16 snem ka rta na ka Sylhet District jong ka ri Bangladesh.
Da kaba shim khia halor ka jingioh lum jingtip kaba thikna, ka kynhun BSF ki la ap ban peitngor ha Dangar, ha kaba ki la ioh ban pynsangeh ia kawei ka kali Maruti Alto, ha kaba ki la ioh ban kem ia 2 ngut ki nong India ba don kti bad kynthup ia kitei ki 3 ngut ki nong Bangladesh kiba thmu ban rung beain sha u pud u sam jong ka ri India.
Katkum ka tyllong khubor, la ong ba ki bor ap pahara BSF ki la pynlong ia ka jingtohkit hadien ba la ioh kem ia kitei ki nong Bangladesh, ha kaba la kynnoh ba ki la rung beain sha u pud u sam ka ri India, da ka jingthmu ban leit sha jylla Kashmir na ka bynta ban wad kam wad jam.
Shuh shuh, la ong ruh ba ia kitei ki nong Bangladesh ba la ioh kem da ki bor ap pahara ki shipai BSF la leit ban aiti noh sha ki bor pulit ka Dangar Police Station jongka East Khasi Hills District na ka bynta ban leh katkum ki kyndon jong ka ain.
