Kyntait ka Mei-ieid ba kam shym la lehbein ia ki khunswet, kiba kynnoh lamler kin kit la ka pap

Nongpoh, Naitung 28: Ka kong Worda Nongbri mynta ka sngi ka la mih ban pynshai paidbah ba  kam shym la lehbein ia ki 3 ngut ki khunswet ba ka ri bad baroh ki jingkynnoh ki dei kiba la shu kynnoh khlem nongrim bad khlem ka jingshisha.

Ka Kong Worda Nongbri ka la mih ban pynshai ruh ka dei hadien ba la mih ha ki lad pathai khubor ba naduh ki 3 ngut ki khunswet bad kynthup ruh ba ki saw ngut ki khun ruit lem bad ka Kong Christabell Wannaing ki la kynnoh ba ka kum ka kmei san ka la thombor ia ki jaka ki puta ka kmie ki 4 ngut shi para bad ruh lehbein ia ki khunswet kumba la mih bad kynnoh ha ki lad pathai khubor.

Haba ia kren mynta ka sngi sha ki lad pathai khubor, ka Kong Worda Nongbri ka la iathuh ba naduh ba sdang ruh ka la dep kren lypa ia ka kmie-ieid kitei ki khunswet kaba la pynbor ia ka ban kan ri ia kitei ki 3 ngut ki khusnwet, hadien ka jingkhlad ka kmie jongki bad mynta ka la mih shisha ka jingkynnoh bad kam sngew ei ei namar ba kam shym la lehbein ne thombor ia ki bad tang kito kiba kynnoh khlem jingshisha kin kit hi ia ka pap.

Pule ruh:U Briew Bym Ju Thep Vote, Kumno U Ieng Ilekshon Bad Pan Vote Na Ki Paidbah, Ong U MLA Umsning

Ka la ong ruh halor ka skhim PMAY-G ban shna ing ia ki khunswet ka dei ha ka kyrteng jong ka bad ka shna ruh  na ka bynta ki khunswet bad ka kloi ruh ban ai ia ki ban shong ban sah, namar ha ka por ba shna ia kane ka ing kim pat lah ban shna sha ka jaka kaba ki kwah namar ba ka dang don ha ka mokotduma.

Ka la pynshai ruh ban shna da ka ing kaba thymmai sha katei ka jaka kan nym kot bor bad lada kitei ki 3 ngut ki khunswet ba ka la ri naduh dangrit ki kwah ban shong ban sah ka kloi ban ai ia ki bad ym ia kiwei pat lait na kitei ki khunswet.

Peit ruh:

Shuh shuh, ka la pynshai ruh ba na ka liang ka ing ka sem ruh ki kwah ia ka jingsuk bad wan ka shongsuk shongsain bad ka pynpaw ruh kum ka kmiesan ka la pyrshang hi ban ia kren iasuk bad ym poi shaei shaei ruh bad kaba kham lyngngoh ka long mynta ba shah kynnoh bamsap pynban ia u rangbah shnong bad ki nongialam shnong barim bad ba thymmai ha kaba tang shi tyngka ruh kam shym la ai pisa ia ki nongialam shnong bad kine ki kynrum ki kynram ki dei tang ki kam ing ki kam sem, ka la byrnap.