U Bah Mayral Born Syiem MLA ka Nongpoh mynta ka sngi u la leit ban ïakynduh syndon ïa u Myntri Rangbah ka jylla u Conrad K Sangma ban buddien ïa u surok Nongpoh-Umden-Sonapur, kumba utei u surok u dei u ba la donkam eh naka bynta ki paidbah jong bun tylli ki shnong ha katei ka thaiñ.
Naka liang u Bah Mayralborn Syiem haba kren ha katei ka sngi ui la ong ba kum u Nongmikhmat uba la shah jied u khlem shong thait ban buddien ïa kane ka kam kaba la don mynta haduh ka wat kaba khatduh bad ai ka jingkhublei ba kyrpang ïaki paidbah kiba la kyrshan lem ïa kane ka mat ba donkam eh khamtam ki paidbah jong ka thaiñ Umden.
Ki Don bun ki surok hapoh ka jylla Meghalaya ki ba la donkam eh ha khmat ban hap shna noh, la ong u Bah Mayralborn, hynrei ka jingleit ban ïa kynduh ïa u myntri Rangbah ka jylla ka long ban kyntu ïaka sorkar ban buh ïa u surok Nongpoh, Umden, Sonapur ha khmat eh namar une u surok u long uba la donkam eh haduh katta katta.
U la ïathuh ruh, ka jingleit jong u kum u Nongmih khmat ban buddien ïa kane ka kam, ka long ban kyrpad na u Myntri ka Sorkar ban pynrung ïa ka jingtyrwa ban pynbha ïa ka surok Nongpoh, Umden, Ri-Bhoi District hapoh ka NESIDS ka ban bei tyngka da ka Ministry of DoNER jong ka Sorkar India haka ka jinglut kaba la antad kumba Rs.52,98,16,000/-.
La ïathuh ruh ba kane ka sngi la ïoh ban ïa kynduh ïa u Myntri rangbah jong ka Sorkar Jylla u Conrad Sangma haka ophis treikam jong u, ha kaba naka liang u Myntri rangbah ka jylla u la pyn sngew ba ïa ka jingpynmang ban shna noh ïa u surok Nongpoh,Umden, Sonapur ka la long kaba tikna.
U Bah Mayralborn u la kyntu ïaki paidbah ba kin ïai shah katba kane ka kam ka dang ïaid kumba ka jingdawa ban ïoh noh ïa une u surok ka dei kaba la slem hakaba bun naki paidbah ki mat shibun ki jingeh haba ki pyndonkam ïa une u surok naka jingjot rathai bad khohruh khohram, hynrei kum ki paidbah ki dei ban ïai shah namar kane ka kam kan nym slem shuh ban urlong.
