Nongpoh, Nailar 08: Ki nongialam ka HYC Sengkmie ryngkat ka HYC Bhoirymbong Circle mynta ka sngi ki la hiar sha ka shnong Umtangling ban phah lem ki jingai jingiarap na ka seng katkum ka jingkotbor ka seng sha ki longing jong kito kiba la duh noh ia la ka jingim dang shen na ka jingshah bat ha ka bording ilektrik.
Kum ban pynkynmaw, kane ka jingjia ka la jia dang shen ha ka shnong Umtangling ba hap ha ka Umiam Police Station, ha kabab ki 3 ngut ki heprit ki la duh ia la ka jingim, na ka jingshah bat ha ka bording ilektrik kaba dei na ka jinghap u sainar ilektrik.
Ha ka jingialam u Samla Hercules Suting kum u Organizing Secretary ka HYC CEC bad u President ka HYC Bhoirymbong Circle u Samla Tyngshain Makri bad u General Secretary u Samla Pyrshahbor Rympeit mynta ka sngi ki la leit ban ia kynduh ia kiba haïing hasem kitei ki heprit ba la duh noh ia la ka jingim bad ki la pynkhamti ruh ryngkat ki song pisa kiba long katkum ka jingkotbor jong ka seng.
Pule ruh: Pynkup burom ka Seng Samla Shnong Pahamsyiem ia 39 ngut ki samla ba pass SSLC bad HSSLC
Ha kane ka jingleit ai jingiarap bad ka jingsngewlem ka seng, kaei kaba pynsngewkhia ia ka seng ka longba kim sngewiahap satia ia ka song pisa ba iarap da ka tnad MeECL sha kitei ki longïing kiba la duh ia la ki khun na ka jingshah bat bording ilektrik.
Haba kren sha ki lad pathai khubor, Organizing Secretary ka HYC CEC u Samla Hercules Suting, u la ong ba ka seng ka sngewkhia ban tip halor ki lad jingiarap ba la ai da ka tnad MeECL sha kitie ki longïing, namar kane ka jingiarap kam sngewiahap shuh haba pyrkhat halor ka jingduh ia ki mynsiem ba kordor.
U la ong ruh ba ka seng kan nym hun satia bad kam pat kwah ban pynpaw ia kata ka song jingiarap ba la ai da ka tnad MeECL bad kum ka seng kan shim khia ia kane ka kam ryngkat kitei ki longing kiba la shah ktah ba ka sorkar lane ka tnad MeECL la kumno kumno ka hap ban pyrkhat kyrpang da ka song pisa kaba kham heh bad khamtam kane ka jingduh ki heprit ia ka jingim kam dei kaba ki la leh khnang hynrei ka dei ka jingtorti ka tnad MeECL ban leh bha ia ki sainar ilektri kiba la don jingma ia ki paidbah, u la bynrap.
Peit ruh:
Shuh shuh, u la bynrap ruh da kaba ong ba ka seng HYC kan dang iaid buddien ia kane ka kam halor ka jingshah ktah kitei ki longïing kiba la duh ia ki khun tang ka jingshah bat bording ilektrik kaba dei hi ka jingbakla ka tnad MeECL bad u la kyrpad ruh naduh ka sorkar bad ka tnad MeECL ba ka dei ban kham pyrkhat kyrpang halor kane ka jingduh ia ki 3 ngut ki mynsiem ba kordong jong ki heprit ha katei ka shnong Umtangling, u la bynrap.
