Nongpoh, Nailar 08: Ban tehlakam ia ki Kali paidbah khamtam kiba ju ieng beain harud ka surok ba ju wan rah ki jingjia ba sngewsih bad ka jingdheng ki Kali, ka ophis u Deputy Commissioner ka Ri Bhoi mynta ka sngi ka la pynlong ia ka jingleit jurip ia kane ka surokbah na Byrnihat shaduh sha Khanapara na ka bynta ban tehlakam ia kito ki Kali kiba ju pynieng khlemakor harud ka surok.
Ha kane ka jingleit jurip la ia trei ryngkat naduh ka ophis u District Transport Officer ka Ri Bhoi bad ka ophis PWD kiba dei ki tnat treikam ban peir kyrpang halor ki jinglong jingman jong ka surrok na ka bynta ban pynsuk ia ka leit ka wan ki paidbah.
Ha kane ka jingleit jurip la ialam ruh da u Assistant Commissioner ka Ri Bhoi u Akash Marak bad la lang ruh ki ophisar na ka tnat transport, ka tnad Pulit bad na ka tnad PWD.
Lyngba kane ka jingleit jurip bun ruh ki Kali paidbah khamtam ki Trok ki la shah dain kuna na ka daw ka jingpynieng khlemakor ia ki Kali ha ka surokbah National Highway.
Ka thong jong ka jingiatrei lang ka ophis u Deputy Commissioner lem bad kiwei ki tnat treikam sorkar ka long ba ki Kali paidbah khamtam ki Trok kim dei ban shu ieng klumar harud ka surok, namar kane ka pynthud ia ka leit ka wan ki Kali paidbah bad bunsien ruh ki ju wan jia ki jingjia ba sngewsih kum ka jingiatyngkhuh kali ba bun ki mynsiem ba kordor ki duh noh ia la ka jingim.
Also watch:
Kum ban pynpaw, ha ka jingshisha ka Surok bah ha Ribhoi District ka dei ban long kaba kylluid naka jingwan jong ka Surok Four Lane, Hynrei namar ka jingpynïeng beaiñ iaki Kali khamtam ki truck ha shi lynter jong ka Surok bah haki bynta Byrnihat shaduh Jorabat ka pynlong ia kiwei pat ki kali ban jynjar haka leit ka wan bad ka ba buh Jingma ruh iaka leit ka wan jong ki Paidbah ha kitei ki bynta.
