Ka Kong Pinki Maring kaba la jop ïaka Mrs World Peace bad kumjuh ruh ka nam Beautiful Skin haka jingïakop pyni riam bad dur bhabriew ki longkmie na kylleng ka pyrthei haka Season 2 jong ka Mrs World International 2024 bala pynlong da ka Glamour Gurgaon haka 1 tarik Jylliew ha Leela Hotels and Resort Ambience Mall Gurgaon ka la wan phai noh sha ka jylla mynta ka janmiet bad ïa katei ka longkmie la pdiang sngewbha ruh da ka kur bad ki bahaiing ha sem naduh kad liengsuiñ Lokpriya Gopinath Bordoloi International Airport, Guwahati.
Kum ban shu kdew hangne ka kong Pinki Maring ka dei ruh ka nongjop ba nyngkong jong ka Miss Meghalaya ha u snem 1998 bad katkum ka khubor bala ioh lum, ka kong Pinki Maring ka dei ka longkmie kaba la rung haka thup ki 60 ngut ki finalist napdeng 500 ngut ki nongïashim bynta na kylleng ka pyrthei.
Naka liang ka ki bahaiing kynthup na ka Kur Maring, ka Kmie bad ki hymmen para kila pynpaw ka jingsngewkmen kaba khraw ïaka nam bad ka burom ba ka kong Pinki Maring kala wanrah naka bynta ka jylla baroh kawei da kaba pdiang ruh da ki syntiew naduh kad lieng suiñ bad mynta katei ka longkmie ka dang don ha lynti bad la ioh jingtip ruh ki dang don ki paidbah kiba dang thmu ban pdiang sngewbha ïaka sa ha Jiva Restaurant ha Nongpoh.
