Shillong, Nailar 20: Tang hadien katto katne por ba la mih ka jingthang ia Ka Kali sorkar, ka jingkawang maw bad shah pynjulor bun ki Kali sorkar bad ki Kali shimet ha Nongbah Shillong bad la don ruh katto katne ki bar jylla kiba la shah bom shah shoh ha ki kynta ba pynlong ka KSU ia ka Bike Rally ban pyrshah halor ka jingkumar ka sorkar ia ki 5 tylli ki mar jingdawa, ki Pulit ka Nongbah Shillong hynnin ka miet ki la kem noh ia 3 ngut ki nongialam ba hakhmat ka KSU ba kynthup naduh u president ba rangbah u Samla Raymond Kharjana, u Vice President u Samla Pynkmenlang Sanmiet bad u General Secretary ka KSU u Samla Reuben Najiar.
Kum ban pynkynmaw, ki nongialam ba hakhliehduh ka KSU u Samla Raymond Kharjana bad u general Secretary u Samla Reuben Najiar hadien ba la dep ban pynlong ia ka Bike Rally hynnin ka sngi ki la kren ruh sha ki lad pathai khubor ban kyntait ba kito kiba leh ia kito ki kam thang kali, kawang maw bad pynjulor ia ki kali sorkar ki dei kiba shim kabu bad kim dei satia ki dkhot ka seng, hynrei ki Pulit ka Nongbah Shillong tang hadien katto katne por ki la kem ia kitei ki 3 ngut ki nongialam ba hakhmat ka KSU kaba dei na kitei ki jingjia kiba la ktah ia ka shongsuk shongsain ki paidbah.
Kumba la ioh lum jingtip Ki pulit ki la ioh kem ruh ia kitei ki 3 ngut ki nongialam ka KSU na Jaiaw, kaba dei ruh tang khyndiat por hadien ba ki la kren sha ki lad pathai khubor ban pynshai halor kitei ki jingjia kiba la jia hynnin ka sngi ha Nongbah Shillong.
Pule ruh:Tur Biang Ki Khun Ki Hajar Ka Hima Langrin Sha KHADC, Dawa Weng Ïa U Syiem Nangtei
Ban pynkynmaw, kine ki nongialam ka KSU ki la pynshai ruh ha ka jingshisha ki la thmu ban pynlong ia ka public rally bad ka shong kyllainmongor ha ka 21 tarik u Nailar 2026 ha Khyndaitlad, hynrei na ka jingmih kitei ki jingjia ki la pynshai sha ki lad pathai khubor ba kin pynlong noh tang ka jingshongkyllainmongor kiba dei tang ki dkhot ka CEC bad kin sangeh noh ban pynlong ia ka Public rally na ka daw ba ki mih kitei ki huri hura bad ki jingshim kabu ban thang ia ki Kali bad kawang maw ia ki Kali kiba la ktah ia ka shongsuk shongsain ba kum ki nongialam ruh ki la pynpaw ka jingsngewkhia kaba jur ba ki kwah ba ka jingiakhih ka dei ban long da kaba jai jai haduh ba kitei ki 5 tylli ki mat ba la buh ki urlong kumba la dawa na ka sorkar jylla.
Peit ruh:
