Dang step wan Lute ki suba Khar Bangladesh na kawei ka ïing ha ka shnong Dona Bhoi ha EJHD

Khliehriat, Nailar  20: Kumba 5 ne 6 ngut ki suba Khar Bangladesh mynta ka step phyrngap ki la wan ban luta ha kawei ka Longing jong u Bah Sarthe Teron ha ka Shnong Dona Bhoi ba hap ha ka Umkiang Police Outpost ha East Jaintia Hills.

Kane ka jingjia ka la jia mynta ka step jong ka sngi Palei ha ka por 3 baje ne 3 shiteng mynstep ba kitei ki runar ki la rung na kynroh jong ka ïing kaba ki la shu ot ia ka tin ba la ker ia ka ïing tang ban ioh rung shapoh jong ka ïing bad ki la shim kabu ruh ha ka jingdum jong ka ing na ka daw ka jingbym don bording ilektrik.

Kumba la iathuh da ki trai ïing, la ong ba kitei ki suba Khar Bangladesh hadien ba ki la rung hapoh ka ing, ki la ot pyrshang ban ot da ka tari ia ka ryndang jong u kpa ka  ing bad kiwei pat ki la teh da u tyllai ia ki kti  ki kjat jong ka kmie bad 3 ngut ki khun bad byrngem ruh ban ban pyniap lada ki pyrta briew.

Ha kane ka jingjia ki don 5 ngut hapoh ka ing ba kyntup ia u kpa, ka kmie bad 3 ngut ki khun katei ka longing bad u kpa u dei ruh rangbah shnong barim katei ka shnong.

Pule ruh: Da kaba siat tear gas ha ka ophis ka KSU ha Jaiaw khynra bad thwet ki Pulit ia ki dkhot ka KSU

La ong ruh ba kitei ki runar ki la ioh rong  tuh naduh ka mobile phone, ki jain ki nep, ki pla skul ki khun katei ka ing, kiwei kiwei ki tiar kordor bad kynthup ruh ia ka song pisa kaba la kot 30 hajar tyngka. Kitei ki runar ki la phet krad ruh hadien ba la dep tuh ia ktiei ki tiar bad ka song pisa na katei ka ing bad hadien ba la wan ki nongshong shnong ym lap shuh ba kitie ki runar ki la phet krad sha ka jaka khappud ba iajan bad ka Bangladesh.

Halor kane ka jingjia, na ka liang katei ka ing ka la dep ruh ban ujor da ka ejehar pyrshah ia kitei ki urnar ha Umkiang Police Outpost ha kaba ki pulit ki dang pynlong ia ka jingthwet ban ioh kem ia kitei ki runar.

Peit ruh:

Halor kane ka jingjia, ki nongialam ka KSU-Narpuh Circle ha ka jingialam u President u Samla Phanuel Tongper ki la leit ban jurip mynta ka sngi ha katei ka ïing bad ki la pynrem jur ruh ia kitei ki runar kiba wan tuh wan lute ia katei ka ing, ba kane ka jingjia kam dei kaba jia tang mynta shisien, hynrei la bunsien ki suba Khar Bangladesh ki ju wan lute sha katei ka shnong ba don ha syndah ka Bangladesh.