Ka Kong Pinki Maring kaba dei ka longkmie kaba la jop ïaka Mrs World Peace bad kumjuh ruh ka nam Beautiful Skin haka jingïakop pyni riam bad dur bhabriew kala wan phai mynta ka sngi sha ka jylla ryngkat ka nam, ka burom bad ka jingkmen bala pdiang sngewbha ruh da ki bahaiing hasem, ki kmie ki kpa bad ki paralok parajor naduh kad liengsuiñ ha Guwahati.
Kum ban shu kdew hangne ka Kong Pinki Maring kala jop ïaka Mrs World Peace bad kumjuh ruh ka nam Beautiful Skin haka jingïakop pyni riam bad dur bhabriew ki longkmie na kylleng ka pyrthei haka Season 2 jong ka Mrs World International 2024 bala pynlong da ka Glamour Gurgaon haka 1 tarik Jylliew ha Leela Hotels and Resort Ambience Mall Gurgaon.
Haba kren bad ka kong Pinki Maring mar sien hiar na kad liengsuiñ, kala pynpaw ka jingsngewnguh ïa u Blei ba u la don ryngkat bad ka naduh ka por ba ka sdang ban leit ban pyrshang ban shim bynta ha katei ka jingïakop, kala ai ruh ka jingkhublei ïa ki bahaiing hasem, ki kmie ki kpa bad ki paralok baroh kiba la kyrshan ïaka haka por ba ka leit shim bynta ha katei ka jingïakop.
“Kano kano ka jingïaleh haka jingim jong nga, nga ïakhun naduh ka mynsiem” la ong katei ka longkmie da kaba bynrap ruh ba lada phi don kano kano ka jingthmu haka jingim jong phi wat ju pynleh noh ei ïaleh kumno ban pynurlong iaka jingthmu bad ka jingphohsniew jong phi namar balei haba nga, nga lah ban pynurlong iaka jingthmu bad ka jingangnud jong nga phi ruh phi dei ban lah, pynpaw katei ka longkmie
Kala ong ruh ba kum ka longkmie kaba don ka jingangnud ban leit shim bynta sha katei ka jingïakop ki don ruh ki nongkyrshan ba na sha lyndet naduh ki kmie ki kpa, ki bahaiing hasem ryngkat ka jingminot nalade.
