Shillong, Naitung 02: Ka kynhun tohkit jong ka tnad Housing haka jylla kan sa leit ban hiar tohkit ban pynshisha halor ka jingkynnoh bamsap ha kaba ïadei bad ki tin sopiing haki 7 tylli ki district jong ka Ri Khasi bad Jaintia ka ban sdang naduh mynta ka sngi.
Kane ka jingleit tohkit jong ki kynhun ka tnad Housing ka dei hadien ka jingmih na ka jingujor ka seng HYC halor ka jingkynnoh sam tin sopiiing kiba tad tor hapoh ka Chief Minister Housing Assistance Programme (CMHAP).
U LC Marak u ba long khlieh ka kynhun tohkit bad Joint Secretary ka Tnad Housing, bad kum ka kynhun kan leit jurip iaki ki kudam jong ki Community & Rural Development Block ha ki tarik ba labuh na ka bynta ka East Khasi Hills kan sdang naduh ka 2 tarik Naitung haduh 9 tarik, ka West Jaintia Hills haka 12 tarik Naitung, ha Ri-Bhoi District 13 tarik, Eastern West Khasi Hills bad West Khasi Hills ha ka 16 tarik, East Jaintia Hills haka 19 tarik bad ka South West Khasi Hills ha ka 20 tarik Naitung.
Kumba la ioh jingtip, u LC Marak u la bthah ia baroh ki District Housing Officers (DHO) bad ki Block Development Officers (BDO) ba ki dei ban iadon hala ki jong ki ophis haka sngi ba wan jurip ka kynhun tohkit na ka bynta ban pynshisha hakaba iadei bad ka jingkynnoh sam tin sopiing tad dor kumba la kynnoh da ka seng HYC.
