Shillong, Naitung 02: Ka Meghalaya Pradesh Congress Committee (MPCC) ha ka jingialang kaba la long ha ka 1 tarik u Naitung 2024 ha ka ophis treikam jong ka ha Shillong ka la rai ban pynkup burom ia u Saleng Sangma, kum u MP ka Party Congress na Tura Parliamentary Seat uba la jop dang shen ha ka elekshon Lok Sabha mynta u snem.
Kumba la pynpaw da u Bah P.N Syiem, nongialam ka Congress sha ki lad pathai khubor, u la ong ba ka Meghalaya Pradesh Congress Committee, ha ka jingiakynduh lang ki nongialam ha ka ophis treikam, ka la shim ia ka rai ban pynkup burom ia u Saleng Sangma ha ka 6 tarik u Naitung 2024 ha State Central Library Shillong.
U la pynpaw ruh, ba kane ka jingpynkup burom ka long shi bynta ban ai burom ia une u nongialam ka Congress, uba la jop don burom kum u MP na ka jylla Meghalaya na ka Tura Parliamentary Seat, ha kane ka Election MP sha Lok Sabha ba dang shu dep shen ha ka ri India.
Shuh shuh, u Bah P. N Syiem kum u nongialam ba hakhmat ka MPCC, u la khot la wer ia baroh ki nongialam ka MPCC, ki Mahila bad baroh ki nongialam ka Congress ba kin wan ia don bynta lang ha katei ka sngi, na ka bynta ban pynkup burom ia une u Saleng Sangma kum u MP ka Congress na Tura Parliamentary seat.
