Ba kan long kum kawei na ka thong ban kyntiew ia ka pule ka puthi bad ka jingnang jingstad ha ka jylla bad ha ka ri hi baroh kawei, u MLA ka UDP bad u ba dei u myntri barim ka tnad Pule puthi ka jylla, u Bah Lahkmen Rymbui, u la kyrpad syndon na u Myntri ka sorkar kmie, ba dei peit ia ka tnad pule puthi ha ka ri, u Dharmendra Pradhan, na ka bynta ba un wad bniah ia ki jingteikam jong ki shnat pule puthi bapher bapher ha ka ri lyngba ka Ministry of Education kiba kynthup ruh naduh ka jingtreikam ka NTA, UGC, NCERT bad kiwei kiwei.
Kumba la mih ki kynrum ki kynram ha kaba la pynlong ia ka NEET examination ha ka ri, u Myntri barim ka tnad pule puthi na ka jylla, u Bah Lakmen Rymbui, u la ong ba u myntri ka sorkar pdeng, u la dei ban khot da ka jingialang kaba kyrpang lyngba ka Central Advisory Board, ha kaba baroh ki myntri sorkar na ki jylla bapher bapher ka ri, ki dei ban long ki dkhot jong kane ka Central Advisory Board bad ruh kumno ban ia thir ne ia tai ia kiwei ki lad ki lynti ban pynbha ia ka jingtreikam ha kaba kyntiew ia ka pule ka puthi.
Haba kren sha ki lad pathai khubor, u Bah Lakmen Rymbui, u la la ong ba ka thong (Concept) jong ka National testing Agency, haba pynlong ia ka examination ka long shisha kaba ai jingmyntoi ia ki samla pule, hynrei haba pynlong ia kane ka examination ka dei ban long kaba khuid ba suba khlem kano kano jingthud ne ka jingktah ia ki samla pule.
Haba ai jingmut sha ka sorkar pdeng, u Bah Lakmen Rymbui, u la ong ruh lada da hap ban pynkynriah ne pynsangeh ia kino kino ki prokram ne ki examination, ka NTA ka dei ban ai jingtip shuwa sha ka Ministry of Education bad dei ruh ban buh thikna da ki tarik kiba biang khnang ba kan nym ktah ia ki samla pule
Kumba ka sorkar pdeng ka la dep ban thung ruh da ka Expert Panel ban peit kyrpang ia ki jingtreikam ka National Testing Agency (NTA), hadien ba la mih ka kynrum ka kynram ha kaba pynlong ia ka NEET examination, u Bah Lakmen Rymbui, u la twad jingmut ruh ban ai jingmut naduh ki samla pule, ki kmie ki kpa bad baroh kiba don bynta ha kane ka kam, khnang ba jingpynlong ia ka NEET examination kan nym wan rah jingthud ia ki samla pule ba ka dei ban long da kaba khuid ba suba ban ai mynsiem ia ki samla pule ka ri.
