Nongpoh, Nailur 12: Ka Dr. D.D Lapang 1st Memorial Coordinating Committee ba la lamkhmat da u Bah Mayral Born Syiem kum u MLA ka Nongpoh Constituency mynta ka sngi ka la pynlong ia ka jingkynmaw burom ia ka jingdap shi snem ka jingkhlad noh u Dr. D.D Lapang da kaba leit buh syntiew bad leh burom ha phyllaw ka Ri Bhoi College kaba don u mot dur sah jingkynmaw u Dr. D.D Lapang ba la tei da ka Young Minds Ri Bhoi District.
Ha shwa ban leh burom ne ai burom ia une u nongialam, la pynlong ia ka jingbuh syntiew ha u mot sah jingkynmaw bad ryngkat ki jingduwai ba kyrpang ba la ialam da u Fr. Peter Syiemlieh u Parish Priest ka Nongpoh Parish.
Ha kane ka sngi la sakhi naduh ka jingdon lang u Myntri sorkar ka jylla u Bah Sosthenes Sohtun, u MLA ka Nongpoh u Bah Mayral Born Syiem, ka MDC ka Kong Rona Khymdeit, u Nominated MDC u Bah Mathew Makdoh, u Bah B.R Blah u khun jong u Dr. D.D Lapang, u Bah R.R Kynsai Makdoh, u Deput Commissioner ka Ri Bhoi u Abhishek Saini, u SP ka Ri Bhoi u Giri Prasad bad kynthup kiwei kiwei ki riew rangbah.
Lyngba jong kane ka sngi la sakhi ruh ia ka jingwan shim bynta kito ki riew rangbah bad ki longkmie kiab ju don bynta ha kaba ia shakri lang ha ka por ba dang don u Dr. D.D Lapang kum u MLA barim ka Nongpoh Constituency.
Pule ruh: Hek Meets Amit Shah, Says BJP Planning To Form Own Govt In Meghalaya
Haba ai jingkren da ki nongkren ha kane kane ka sngi naduh u Bah Sosthenes Sohtun, u Bah Mayral Born Syiem lem bad kiwei ki la pynkynmaw ba u Dr. D.D Lapang u dei u nongialam uba kat u nongialam uba la shakri ia ki piadbah bad ki la pynpaw ruh ia ki synniang bad ki kam shakri kiba u la shakri ia ka Ri Bhoi, jylla bad wat ha ka ri.
Ki kam kiba khraw kiba u la leh ha Ri Bhoi ki kynthup ia ka jingwan rah ia ka District ba pura ha Ri Bhoi, ka jingseng ia ka Ri Bhoi College, Alpha English Higher Secondary School, ka Northern Ri Bhoi College bad nalor Shibun ki kam pynroi kiba u la wan rah ha Nongpoh bad ha Ri Bho hi baroh kawei.
Peit ruh:
Kiei ki nongkren ki la pynpaw ruh ba u Dr. DD Lapang um dei tang u MLA ka Nongpoh uba la jop 8 sien na Nongpoh bad u dei ruh u nongialam uba la bat ia ka kyrdan myntri sorkar la bunsien bad la 5 sien kynthih u la ioh bat ruh kum u myntri rangbah ka jylla Meghalaya bad nalor kata u don bynta ruh ha ka kam u Blei kum u nongkren ne nongialam ba paw jong ka Balang Presbyterian.
