Kumba 116 ngut ki paidbah ba kynthup ia ki kynthei bad khynnah, ki la duh noh iala ka jingim ha ka jingialang niam Hindu ‘Satsang’ lane ka jingialang duwai kaba la pynlong ha ka shnong Phulrai jong ka Hathras District ka jylla Uttar Pradesh ha ka Sngi Ba Ar kaba la wan ban iadon bynta da ki hajar ngut ki riewngeit jong ka niam Hindu, hadien ba ka la don ka jingiathyngian bad ka jingiaban uwei ia uwei pat.
Katkum ka jingiathuh jong u Inspector General ba dei khmih ia ka Aligarh Range, u Shalabh Mathur, la pynthikna ba kumba 116 ngut ki briew kila duh noh iala ka jingim bad pyntip ruh ba kumba 27 tylli ki metiap la buh ka jaka buh metiap jong ka Etah katba kiwei pat ki metiap ki dang don hapoh ka Hathras District.
Utei u heh pulit u la pyntip ruh ba na ka liang ki bor pulit ki dang ialeh katba lah ban pynkit ia kiba la mynsaw ha katei ka jingjia sha ki jaka ai jingsumar bapher bapher. U la iathuh ruh ba na ka liang ki bor pulit ka jylla Uttar Pradesh, ki la ujor ejahar halor katei ka jingjia pyrshah ia ki nongpyniaid bad pyntip ruh ba ka kyrteng jong kito kiba don bynta ban pan jingbit halor katei ka jingialang ruh kin ngat lang ha ka ejahar. Utei u heh pulit u la pyntip ruh kumba long mynta, la iohi ba ka jingdon jong ki briew katei ka jaka ka long palat ban ia kaba la ai jingbit.
Kawei na ki longkmie kaba leit ban don bynta ha katei ka jingjia, ka la iathuh ba katei ka jinglehniam, la pynlong ban pyndonburom ia uwei u nongialam Hindu, uba la tip kyrteng kum u Bhole Baba ba ju khot sin ruh kum u Narayan Saakar Hari bad katei ka jingjia ka la sdang hadien ba ki ‘riewngeit Hindu ki sdang ban mih na katei ka jaka.
Ka tyllong khubor ka iathuh ruh ba ki ‘riewngeit Hindu kiba la leit sha katei ka jinglehniam, ki la shah khang ban mih bad hap ban ap tad haduh ba ka kali jong utei u Bhole Baba kala dep ban mih na katei ka jaka, kaba khim bad kaba rit, kaba la pynlong ia ki paidbah kiba leit ha katei ka jaka ban shu ia mareh klumar bad ia thyngian ia ban uwei ia uwei pat.
U majistor ka Hathras, u Ashish Kumar, u la iathuh ba kane ka jingjia kala jia hapoh ka shnong Phulrai kaba dang hap hapoh ka Sikandra Rao Police Station jong ka Hathras District bad pyntip ruh ba kane kadei ka jingialang shimet bad ia ka jingai jingbit, la ai da u majistor jongka Hathras Sub Division bad ia ka jingpynbeit ki bor pahara, la pynbeit da ki bor pyniaid district jong ka Hathras katba ia kiwei kiwei pat ki jingdonkam la khmih da ki nongpyniaid katei ka jingialang.
U myntri rangbah ka jylla Uttar Pradesh, u Yogi Adityanath haba shimkhia halor katei ka jingjia, u la bthah ruh ban pynlong ia ka jingtohkit halor katei ka jingjia. La ioh jingtip ruh ba u myntri rangbah ka ri, u Narendra Modi ryngkat bad ka President jong ka ri, ka Droupadi Murmu, ki la ai ia ka khubor sngewlem ia kito kiba la duh noh iala ka jingim ha katei ka jingjia bad duwai ruh na ka bynta kito kiba mynsaw ba kin jem noh kloi. U Narendra Modi u la pynpaw ruh ba ka sorkar kmie kan iarap katba don ki lad ki lynti sha ka jylla Uttar Pradesh halor kane ka jingjia.
