Nongpoh, Nailur 18: Ka BJP ST Morcha ka jylla Meghalaya mynta ka sngi ka la pynlong da ka prokram ai jinghikai ia ki Driver bapher bapher ha Ri Bhoi naduh ki Local Taxi, ki Sumo bad ki Auto Rickshaw halor ka kamram ki Driver ban ai jingshngain ia ki paidbah ha kaba ia kane ka prokram ai jinghikai la pynlong ha ophis ka BJP ha Nongpoh.
Ha kane ka prokram ai jinghikai la don ryngkat naduh u State President ka BJP ST Morcha U Himanta Timung, ka Kong Wanrika Lyngdoh State Secretary ka ST Morcha, u Bah Wankitbok Poshna State General Secretary ka BJP, ka Kong Deliana L. Nonglait State Secretary ba deit peit ia ka Ri Bhoi, u Bah Albertus Lapang president ka Jirang Mandal lem bad kiwei kiwei ki nongiam.
La wan ruh ban ai jinghikai halor ki kyndon ain niah kali da u Additional SP ka Ri Bhoi u J. Rabha, u Liam Ingty SI Traffic, u P. Roy Chowdhury na ka tnad PWD, u Manuj Sing na DTO, bad kynthup ruh ki president bad ki secretary na ki Association Local Taxi, Sumo bad Auto Rickshaw.
Ha kane ka sngi ym tang ba ki la ai jinghikai ia kita ki kyndon bapher bapher ba hap ban bud ryntih da ki driver ban sngain ki paidbah, hynrei na ka liang ka BJP ST Morcha ki la ai ruh da ki jingai sngewbha sha ki president bad Secretary ki Association kaba long shi bynta ban burom halor ki kam ba ki la shakri ia ki paidbah kum kita ki driver niah Kali.
