Jowai, Naitung 03: Kumba mynta ka sngi ka Seiñ Raij Jowai kan pynkut noh ia la lehniam Beh Deinkhlam, kaba dei kawei na ka lehniam kaba heh tam ha Jaintia bad ha ka jylla hi baroh kawei, na ka liang ka Seiñ Raij Jowai mynta ka sngi kan pynkut noh ia kane ka lehniam da ka nguh ka dem Blei ban ainguh ia la u Nongbuh nongthaw kumba la ju long man la u snem.
Ia kane ka jinglehniam Behdienkhlam la pynlong ha Jowai ha kaba nalor ki khon Raij Jowai, da ki hajar ngut ki paidbah na kylleng ka jylla bad na shabar ki la wan ban sakhi, ha kaba ka seiñ kan pynkut noh ia kane ka lehniam Behdienkhlam.
Kum ban pynkynmaw, kane ka lehniam Behdienkhlam ka Seiñ Raij Jowai, ka dei kawei na ka lehniam tynrai ki niam tre ha Jowai, Jaintia Hills, ha kaba ka jingthmu jong kane ka lehniam ka long pan bor na u Blei, da kaba nguh ba dem, ba u Blei Nongbuh Nongthaw un beh krat ia u Ksuid u Khrei, ka jingpang ka jingshitom, ka khlam ka ngoh bad kumjuh ruh shwa ban kut ka thung ka tep, ban ioh ka jingkyrkhu na u Blei Nongbuh Nongthaw.
Kumba long haduh mynta, kane ka lehniam Behdienkhlam ka dang iaid shaprhang ha kaba ki Doloi bad ki Lyngdoh ryngkat kiwei ki heh na ka Seiñ Raij Jowai, ki dang pyndep ia kiba bun ki jinglehniam, kaba long shi bynta jong kane ka lehniam Behdienkhlam kaba kin pynkut noh mynta ka sngi.
