Ka jingiap jong ki ‘riewngeit niam Hindu kiba la leit ban iashim bynta ha ka jingialang niam ‘Satsang’ lane ka jingialang duwai, ka la nang kiew shuh shuh bad katkum ka tyllong khubor ba la ioh lum, ki la don haduh 121 ngut ki briew kiba la duh iala ka jingim ha katei ka jingjia ba kynthup ia 108 ngut ki kynthei bad 7 ngut ki khynnah rit.
Katei ka jingjia kaba shyrkhei, kadei kaba la jia hadien ka jingkut jong katei ka jinglehniam ‘Satsang’ ka la don ka jingiamareh thyngian ia ban uwei ia uwei na kadaw jong ka jingbud nadien ka kali jong u ‘riewniam Hindu uba la tip kyrteng kum u Bhole Baba ba ju khot sin ruh kum u Narayan Saakar Hari. Ha kane ka jinglehniam, palat 2 lak tam ki ‘riew ngeit jong ka niam Hindu ki la leit ban iashim bynta ha shnong Phulrai jong ka Hathras District ka jylla Uttar Pradesh.
La ioh jingtip ruh ba na ka liang ki bor pyniaid sorkar ka jylla Uttar Pradesh, ki la pynban ban siew bai lutksan T. 2 lak ia kito kiba la khlad noh ha kane ka jingjia bad T. 50 hajar pat na ka bynta kito kiba mynsaw.
