Ka Netherlands ka la pynthikna ialade ban rung sha ka Quarter Final ha ka European Cup 2024, kata ka dei hadien ba ka la lah ban pynliem noh ia ka Romania da 3-0 ha ka jingiakhun ba khatduh jong ka ka Round-16.
Katei ka namjop jong ka Netherlands, ka la wan lyngba ka kol kaba nyngkong ia kaba la thep ha ka kylla step jong ka jingiakhun lyngba u Gody Gakpo, uba la thep ha ka minit ba 20 jong ka jingiakhun. Haba bteng ka kylla miet ka Netherlands ka la nangnion shuh shuh ia ka Romania, ha kaba ka la iohlad biang ban thep kol lyngba u Donyell Malen, uba la thep ha ka minit ba ba 80 bad ha ka minit ba 90 jong jong ka jingiakhun.
Haba phai pat sha ka jingiakhun kaba la long hapdeng ka Turkey pyrshah ia ka Austria, ka Turkey ka la lah ban pynliem noh ia ka Austria da 2-1.
Ka jingiakhun hapdeng ka Turkey pyrshah ia ka Austria, ka long ba ka Turkey, ka la lah ban lamkhmat nyngkong ia ka jingiakhun, ha kaba ka la ioh ban thep ia ka kol kaba nyngkong, lyngba u Merih Demiral, uba la thep ha ka minit ba 1 jong ka jingiakhun bad kaba la neh haduh ba kut ka kylla step.
Haba bteng ka kylla miet, ka Turkey ka la ioh biang ia ka kabu ban thep kol lyngba u Merih Demiral, uba la thep ha ka minit ba 59. Kham hadien kata ka Austria ka la ioh ia ka kabu ban pynphai shikol ia kaba la thep da u Michael Gregoritsch ha ka minit ba 66, hynrei ki khlem iohlad shuh ban pynphai biang. Na bynta ban pyniakhaid ne pynjop ia ka jingiakhun bad kiba la hap ban shu hun noh ia ka namrem kaba 2-1 hakhmat ka Turkey.
Ka Quarter Final jong ka Euro Cup 2024 kan sdang ha ka miet jong ka 5 tarik, ha kaba ka jingiakhun kan long hapdeng ka Spain pyrshah ia ka Germany.
