NA KA LYER BIH, KHLAD AR NGUT KI NONGBYLLA TIH DEWIONG NA MEGHALAYA HA TINSUKIA
Kumba ar ngut ki nongbylla tih Dewiong kiba la antad ba kidei na ka jylla Meghalaya, ki la khlad noh hadien ba la suba ba ki la kum ring mynsiem ia ka lyer bih hapoh kawei ka par Dewiong beain kaba don ha Lidu Pahar jong ka thain Dharna Basti ka Tinsukia District ka jylla Assam.
Kane ka jingjia, ka pynkynmaw biang ia ka jingjia kaba la dep jia shi bnai mynshwa, ha kaba ar ngut ki rangbah na Ri Bhoi District kiba leit bylla tih Dewiong ha katei ka juh ka thain jong ki par Dewiong beain ka jylla Assam ki la duh noh iala ka jingim hadien ka jingshah tep im hapoh ka par Dewiong na ka jingtwa kynsan jong u lum.
Katkum ka khubor kaba la ioh lum mynta ka sngi, la iathuh ba kitei ki ar ngut ki rangbah kiba la ngat ha ka lyer bih hapoh katei ka krem Dewiong, la lap da ki para ba treilang ha ka janmiet jong ka 1 tarik u bnai Naitung, 2024 ha ka jingbymtip briew shuh.
Kumta la pynkit noh mar mar ia kitei ki arngut sha Margherita First Referral Unit na ka bynta ban ioh ia ka jingsumar, hynrei na ka liang ki doctor ba dei khmih ia katei ka jaka ai jingsumar, ki pynbna ba kitei ki ar ngut ki rangbah kila dep ban khlad lypa.
Kat haduh ba thoh ia kane ka khubor, ym pat ioh satia ia ka jingtip kaba thikna ia ka kyrteng bad ka jaka sah jong kitei ki ar ngut ki rangbah kiba la antad ba kidei na ka jylla Meghalaya.
