Tylli Ki Samla Pule Khasi Ban Shimbynta Ha Ka Fresher’s Meet Ka KSU RIST-USTM Unit Ha USTM Killing

Nongpoh, 02 Nailur: Da ki spah ngut ki samla pule kiba dei ki Khasi, mynta ka sngi ki la iashimbynta ha ka (Fresher’s Meet) ne ka jingkynduh lang hapdeng ki samla Khasi kiba dang wan pule thymmai ha skulbah University of Science & Technology, Meghalaya (USTM) bad Regional Institute of Science & Technology (RIST), kiba don ha Killing Ri Bhoi, kaba dei ruh ka sngi jong ka jingpynskhem ia ki nongkitkam ba thymmai ka KSU RIST-USTM Unit.

Ha katei ka Fresher’s Meet kaba la pynlong da ka KSU RIST-USTM Unit, la sakhi da ka jingdon u Samla Pynshailang Rani, Asst. General Secretary ka KSU Sengkmie, u Samla Kevin Nelson Wanrap, Publicity Secretary KSU Sengkmie, u Bah Lambok Rymbai, Vice-President KSU NKHD, u Samla Toning Lapang, Education Secretary KSU NKHD, Babu Dusyansar Mawlong, Nonghikai ha ka lain pule Khasi ha skulbah USTM, kiwei ki nonghikai kiba dei ki Khasi lem bad kiwei.

Lyngba jong katei ka jingiakynduh hapdeng ki samla pule ba thymmai hapoh katei ka skulbah, ka RIST-USTM Unit, ka la ioh ruh pynthymmai ia ki nongkitkam kiba pura jong ka RIST-USTM Unit na bynta ka samoi treikam jong u snem 2026/2027.

Sa pule ruh: Pynshai ka RBPC īaka jingpynpaw ka Seng Samla Mawlai Pyllun halor ka Post Staff Nurse Ha Ri Bhoi

Ki nongialam ba thymmai ka KSU RIST-USTM Unit, ki kynthup ia u samla Shootingstar Thangkhiew kum u President, u Samla Pynsuklang Rapsang kum u General Secretary lem bad kiwei pat.

Ki nongai jingkren ha katei ka sngi, kiba kynthup naduh u Samla Pynshailang Rani, nangta u Babu Dusyansar Mawlong lem bad kiwei ki heh nongialam ka KSU, ki la iaroh ia ki nongialam ka KSU RIST-USTM unit, kiba la shimkhia ban pynlong ia katei ka jingiakynduh hapdeng ki samla pule Khasi, kiba pule ha USTM bad RIST.

Ha ka jingkren jong ki, ki la ai ruh ka jingiaroh ia ka rukom treikam ka KSU RIST-USTM Unit, namar nalor ba ki peit na bynta ka bha ka miat ki samla Khasi kiba pule ha katei ka jaka, hynrei ki ju leh ruh ia ki kam ban iarap ia ki para Khasi, kiba kynduh jingeh, khamtam haba dei sha jylla Assam, kaba don marjan bad katei ka skulbah.

Ki la kyntu ruh ia ki samla pule Khasi ha katei ka skulbah, ba ki dei ban long kiba don burom akor, ban pynneh pynsah ia ka ktien ka thylliew bad ia ka riti dustur kum ki Khasi.

Sa peit ruh