Shillong, Risaw 10: Ka Khasi Student Union (KSU) ka la shim syndon da ka sienjam kaba tyngeh ban ujor syndon sha u Chief Engineer ka PWD ban phah weng noh mardor ia kiba bun ki Pandal leh niam puja ba la kynnoh ba ki shna beain ha ki surok paidbah.
Ha ka dorkhas ba la phah sha u Chief Engineer ka PWD, ka KSU ka la buh ia ka jingdawa ba dei ban weng noh mardor ia kito ki Pandal leh niam Puja kiba tei beain ha ki surok paidbah, namar kane ka la wan rah ia ka jingthud ia ka leit ka wan ki paidbah bad ka buh jingma ruh ia ki paidbah na ka jingshna beain ha ki jaka paidbah.
Kumba la pynpaw, ka KSU kala shim syndon ia kane ka rai ban ujor sha u Chief Engineer ka PWD ban phah weng ia ki Pandal ba shna beain, ka dei hadien ba ka seng ka la ioh ia ka jingujor na kiba bun ki paidbah ba ka jingshna Pandal ha ki surok ne ki jaka paidbah ka la pynthud ia ka leit ka wan ki paidbah bad ka buh jingma ruh ia ki paidbah ba lei tba wan na ka jingkhim jong ka surok.
Pule ruh: Ka Jingwan Poi U Paidbah Sha Madan Polo, Dei Ka Dak Ba Shai Ban Jop U Dr. Myrboh: Ardent
Shuh shuh, ha katei ka dorkhas, ka KSU ka la dawa ruh lyngba u Chief Engineer ka PWD ba u dei ban phah leit tohkit bad leit jurip ia kito ki Pandal ba la shna beain ha ki jaka paidbah ne ki surok paidbah bad kum kine ki jingshna ia ki pandal dei ban shna ha ki jaka ba lait ban pynthud ia ki paidbah bad ym ban shu shna ha ki jaka paidbah ne ki surok kiba long ka jingthud ia ka leit ka wan ki paidbah.
Peit ruh:
Kum ban pynkynmaw, ka KSU Rynjah Unit ba hap ha ka Nongthymmai Circle dang shen ruh ka la leit ujor sha u Deputy Commissioner ka East Khasi Hills bad sha ka tnad PWD ban ujor halor kane kajuh ka mat, kaba dei halor ka jingshna pandal la shu shna ha ki surok paidbah bad ruh khlem da ioh jingbit na ka shnong bad ki bor ba dei peit, ha kaba kane ka buh jingeh ia ka leit ka wan ki paidbah.
