Shillong, Risaw 10: “Ka jingkhih win u paidbah bad ka jingpynkhih win ka Party ka iapher” ong u Dr. Batskhem Myrboh u kyrtong ka VPP haba kren sha ki lad pathai khubor mynta ka sngi hadien ka jingialang paidbah ka VPP ha Madan Polo.
Ia kitei ki kyntien u Dr. Batskhem u la kren hadien ba la buh kylli da ki Nongthoh Khubor kaba dei halor ka jingbun paid ka NPP ha ka jingdon ki MLA bad ba ka don ruh ha ka bor synshar ba lehse ka buh jingma ia u kum u kyrtong ka VPP ban aireng ha kane ka election MP shiteng samoi na ka Shillong Parliamentary Constituency.
U la ong ruh ba ka jingkhih win ka party bad ka jingkhihwin da ki paidbah ka iapher bad ka VPP kam don jingma satia ban jop ha kane ka election MP shiteng samoi, namar dei u paidbah hi uba ieit bad uba khih win ban kyrshan ia ka VPP party kiba dei halor ki nongrim bad ki mat ba ka VPP ka dei ka party kaba thrang ban wan rah ia ka jingsysnhar kaba khuid bad kaba shakri shisha na ka bynta ki paidbah.
U la bynrap ruh da kaba ong ba um don jingartatien ban jop ha kane ka election MP shiteng samoi, namar ki paidbah hi ki la Shaniah ia ka VPP, kiba dei halor ka thong ban wan rah ia kata ka synshar kaba khuid kaba suba bad ka party kaba synshar na ka bynta ki jingmyntoi jong ki paidbah ka jylla.
Pule ruh: Ka Jingwan Poi U Paidbah Sha Madan Polo, Dei Ka Dak Ba Shai Ban Jop U Dr. Myrboh: Ardent
Shuh shuh, u la pynpaw ruh ba lada ki paidbah ki pynjop ia u ha kane ka election shiteng samoi un long uta u nongiasaid ia ka jingdonkam ki paidbah sha ka sorkar India kaba dei katkum ba la ai bor da ka riti synshar ka ri ban kren ne iasaid katkum ka jingdonkam u paidbah ha ka jylla.
Peit ruh:
Kiwei kiwei ki mat kiba u la pynpaw ba un shim khia lada jop ha kane ka election shiteng samoi ki kynthup ban ia said na ka bynta u pud u sam ba pura ka jylla, ka jingpynrung ia ka ktien Khasi ha ka khynit ba phra ka riti synshar ka ri, ka pule ka puthi kaba bit ba biang ha ka jylla bad nalor kiwei kiwei ki mat ba dei ban ia said na ka bynta ka jingbit jingbiang ki paidbah ha ka jylla.
