Nongpoh, Naiwieng 02: Kum uwei u na u riew rangbah ka thain Ri Bhoi Sepngi ha Ri Bhoi District, u Bah Oral Syngkli ha ka sien kaba nyngkong u la shim ia ka sienjam ban pynlong ia kawei ka lympung ialehkai phutbol bala tip kum ka 1st Above 40 years one Day Knockout Football Tournament 2026 ba la pynlong ha ka 30 tarik u Risaw 2026 ha Madan Western Ri Bhoi ha Patharkhmah.
U Bah Oral Syngkli u la shim ia kane ka sienjam ban pynlong ia kum kane ka tournament ban ioh shim bynta kito kiba la dap 40 snem shaneng ka long hikai ba ka kam ialehkai sport ka dei kaba ai jingkoit jingkhia bad kane ka sain pyrkhat jong u ka mih ka dei ruh hadien ba u la ioh mynsiem na ka mei ieid Kmoin Wahlang ba wat ha ka rta kaba 78 snem ka dang mih shakhmat ban leit iakhun ha ki rynsan mareh marathon ha kylleng ki jylla ka ri bad wat sha ki ri nongwei ruh kumjuh bad ioh ban khur ia kiba bun ki takma.
Ha kane ka sngi la wan ai mynsiem ruh da u Phardar Kynsai Kurbah Parish Priest ka Umkadhor Parish, u Pastor F. Syngkli naka Jirang Presbytery, u bah Oral Syngkli uba dei u trai ka Syngkli Colony FC kaba pyniaid ia kane ka lympung lem bad ki riew rangbah ka thain.
Haba kren ha kane ka sngi u Bah Oral Syngkli ula ong ba ka daw kaba u la pynlong ia kane ka tournament ka dei ka jingioh mynsiem na ka mei ieid Kmoin Wahlang ba wat ha ka rta kaba 78 snem, hynrei ka dang lah ban leit iashim bynta haki lympung mareh haka ri bad shabar ka ri ruh kumjuh bad ba ka la ioh ban khur ia kiba bun ki takma jingjop.
Ha kane ka sngi la ai jingkren ruh da u Phadar Kynsai Kurbah bad u Pastor F. Syngkli kiba la ai khublei kyrpang ia u Bah Oral Syngkli uba shim ia kane ka sienjam ban pynlong ia kane lympung ban ai pat sha ka imlang ka sahlang ia kaba U Blei ula kyrkhu ia u bad ia ka ing ka sem.
Ha kane ka sngi ki don hynriew tylli ki kynhun kiba la wan ban iashim bynta ba kynthup naduh na Umroi, Umsning, Nongpoh bad ruh na ki kynhun ka thain Western Ri Bhoi.
Napdeng kitei ki 6 kynhun kiba la poi sha ka phainal ka dei ka kynhun OIG Jong-i pyrshah iaka RBWO, ha kaba ka jingiakhun ha ka phinal naduh ka kylla step haduh ka kylla meit ka la kut ha ka jingiakhaid khlem da don ba lah ban thep kol.
Dei lyngba ka jingshim rai da ka tie breaker ba ka kynhun OIG Jong-I ka la ioh rah syndon ia ka nam jop da kaba pynrem ia ka RBWO da 5-3 kol.
Ka kynhun OIG Jong-i kum ka lahduh kala ioh ban rah iaka song pisa kaba T. 50 hajar katba ka RBWO kaba wan ba ar, kala ioh ban rah iaka song pisa kaba T. 30 hajar.
