Ka sorkar pdeng, lyngba ka tnad jong ka Road Transport & Highways ka la mynjur ia ka mang tyngka kaba T. 24,000 klur na ka bynta ban shna ia ka surok saw lain (four lane) naduh na Umiam ter ter shaduh sha Silchar jong ka jylla Assam.
U Bah Prestone Tyngsong, myntri ka jylla ba dei khmih ia ka tnad PWD Roads, u la iathuh hynnin ka sngi ba na katei ka mang tyngka kaba T. 24,000 klur, T. 12,000 klur kadei ia ka jylla Meghalaya, kata ban shna iaka surok saw lain naduh na Umiam shaduh sha Malidor kynthup ruh ia ka bai jaka puta, katba T. 12,000 klur pat kadei na ka bynta ban bteng ia katei ka surok na Malidor ter ter shaduh sha Silchar jong ka jylla Assam.
Utei u myntri ka jylla, u la iathuh ruh ba katei ka jingshna ia katei ka surok saw lain kan pynsuk bad pyniasoh ia ki jylla ba marjan jong ka Meghalaya ba kynthup naduh ka Assam, Tripura bad Mizoram.
Shuh shuh, u Bah Prestone u la pyntip ruh ba u myntri jong ka sorkar pdeng ba dei khmih ia ka tnad Road Transport & Highways, u Nitin Gadkari u la mynjur ia ka song pisa ba T. 290 klur na ka bynta ban maramot iaka surok National Highway 6 naduh ka shnong Lumshnong shaduh Malidor ba hap hapoh ka East Jaintia Hills District bad kaba don mynta hapdeng ka jingjot rathai.
