Shillong, Naitung 5: Kumba la don ka jingkynnoh ba ka la don ka jingiapher jingmut bad ka jingiapait ia pra hapoh ka Regional Democratic Alliance (RDA), u Nongialam ka UDP bad uba dei ruh u myntri sorkar, u Bah Paul Lyngdoh, u la pynpaw ba ka don shisha kata ka jingiapher jingmut, kaba dei na ka daw ka jingbym don ka jingiashaniah ba markylliang hapdeng ka UDP bad ka HSPDP.
Haba kren ia kiei kiei kiba lah ban long kiba bha, u Bah Paul Lyngdoh kum u nongialam ka UDP, u la kam ba ka don shibun ki jingiapher jingmut bad ka jingbym ia sngewthuh jingmut, namar na ka liang ka party UDP bad HSPD ki la ia kynnoh iwei ia iwei halor shibun ki jingduna, kaba la mih hadien ka election MP sha Lok Sabha ba ki dang shu dep shen ban ia trei lang.
“Kiei kiei ki sa long bha, ngim dei ban don kano kano ka jingtieng bad ngi dei ban don kata ka jingshaniah ba mar kylliang, kaba ngi donkam ban ia pynbeit sani ne pynbha” ong u Bah Paul Lyngdoh.
Ha kajuh ka por, u Bah Paul Lyngdoh, u la pynshai ruh ba ngin nym pan shuh ka jingkyrshan na ka HSPDP lyngba ka RDA bad ha kane ka election sha ïing dorbar thaw ain ha District Council, ka UDP kan iakhun la kajong khlem da donkam ka jingkyrshan ka HSPDP.
“ Wat la ia kine ki kynrum ki kynram, ym shym pat la pyntip sha ka UDP, ngi lah ban ia kren pynbeit ia kine ki kam kham bha, dei tad hadien ka jingiakynduh lang bad ka jingiatai sai kum ka party ba la ia synrop lang ban iatrei lang “ ong u Bah Pual Lyngdoh bad u la bynrap ruh kumba long haduh mynta ka party HSPDP ka dang don hapoh ka RDA, bad ka la rai ba ha kane ka election District Council kin ia khun la kajong” u la bynrap.
U la ong ruh ba shen kine ki ar tylli ki party ba la iateh lok, ki sa ia shong pyrkhat na ka bynta ban ia shim rai ne ia kren kiei pat ki lad ki lynti ba ki sa ia shim nangne shakhmat kumba la ia teh lok ban ia trei lang baroh shi katta.
Haba kylli, lano ka jingiakynduh lang ka RDA kan sa long, u Bah Pual Lyngdoh, u la ong ba ia kane ka rai yn shim hi da u President ka UDP bad HSPDP bad kaei ka rai kaba kin sa ia shim lang kin sa pynlong pat ia kata ka jingiakynduh lang.
Haba mynjur ba ka don ka jingbym iahun hapdeng ki nongialam ka UDP na ka bynta ban iatrei lang bad ka sorkar MDA, u Bah Paul Lyngdoh u la ong ba u snem 2023 ka dei ka dak kaba shai ba la shim rai ban ia trei lang bad ka sorkar MDA bad kumba long mynta kiba bun ki kyrshan bad ki dang kin dang iai kyrshan ban don lang ba ka sorkar MDA.
Shuh shuh, u la ong ruh haba wad bniah ia kaei kaba la bakla, lyngba ki jingai jingmut bapher bapher la pynpaw, ba ki don ki jingai jingmut kaba kham khlain bad kaba rai ban pyrshah ia ka MDA bad haba khein khyllum pa, kumba la shim rai na ka jingbun paid ka dei ka rai jong u u snem 2023 ba la rai ban ia don ryngkag bad ka sorkar MDA, u la pynshai shuh shuh
