Kumba dang shen ka sorkar jylla ka la dep ban siang rong thymmai ia ka surok na ka shnong Liarbang ha Ri Bhoi District ba pyniasoh shaduh sha Jaintia Hills bad kaba hap iaid lyngba bun tylli ki shnong shaduh sha Wah Umkhen, shwa ban poi sha Jaintia Hills bad na ka bynta ka jingshngain ki paidbah ha ka leit ka wan la donkam ruh ban buh ia ki ‘Speed Breaker’ ha ki jaka paidbah, kaba long shi bynta ban iada na ka jingniah khlem akor ki dribar ia ka kali.
Kumba dang shen, uwei u rangbah briew na ka Shnong Khyndewso, u la duh noh ia la ka jingim, na ka daw ka jingshah ïuh ha kawei ka Bolero Pick-up, kaba khlem da ioh kem ne ioh bat satia bad kum kine ki jingjia ba sngewsih ki jia ka dei na ka daw ka jingpynher sted ia ki Kali wat ha ki jaka paidbah.
Haba ia kren bad u Rangbah Shnong ka shnong Khyndewso, u Bah Nicholas Malai, u la ong ba ka don shisha ka jingma kaba khraw ia ka leit ka wan ki paidbah, da ka jingbymdon ki ‘Speed Breaker’ ha ki jaka paidbah, kata naduh na Liarbang sha wah Umkhen, namar ka jingpynher sted ki Dribar ia ki Kali ha ki jaka paidbah ka wan rah pynban ka jingjia ba sngewsih.
U la iathuh dang shen ha ka Shnong Khyndewso, ka la don ka jingjia ba sngewsih, ba uwei u rangbah, u la duh noh ia la ka jingim, na ka daw ka jingpynher sted ia ki kali bad wat ia katei ka Kali ba syllad bad ïuh ia u rangbah ruh ym shym la ioh bat satia.
“Ka daw kaba la pynlong ia ka shnong ban kyrpad ruh na ka bynta ban buh ia ki ‘Speed breaker’ ha katei ka surok paidbah, ka dei hadien ba la dep ban siang rong ia ka surok bad ba ka surok ka la bha ba bun ki Kali ki pynher sted haba iaid na katei ka surok bad ka jingma kaba khraw pat ka ka long ia ki khynnah skul bad ia ki paidbah ba bun tylli ki skul ki don harud surok. U la buh ruh ka jingkylli, lada jia ki jingia ba sgewsih kumba la jia na ka por sha ka por mano ban shim ia ka jingkitkhlieh” ong u Bah Nicholas Malai rangbah shnong ka shnong Khyndewso.
U la ong ruh hooid, ka tnad PWD ka la buh ia ki kynja dak (sign or marking) ha ka surok bad bun hi na ki nongniah kali kim sngewthuh ia kitei ki dak ba la buh da ka tnad PWD bad kaei kaba donkam ka long ba ha ki jaka paidbah la dei ban buh ki speed breaker bad ruh ki kynja signboard khang ba ki nongniah kali kin sngewthuh ban pynsuki ia ka kali haba ki iaid lyngba kitei ki jaka paidbah.
Shuh shuh, u la buh ruh ka jingkyrpad ia ka tnad PWD ha Ri Bhoi ba kin shim khia lem ban buh noh ia ki kynja speed breaker bad ki signboard, khnang ba nangne shakhmat kan nym mih shuh kano kano ka jingjia ba sngewsih, kaba dei tang na ka daw ka jingpynher sted ia ki Kali ha ki jaka paidbah, u la bynrap.
