“Ka Infiltration Check gate, kaba don ha Byrnihat, ka dei tang ka shynrong ba khlem jabieng bad ka briew ba khlem bniat” ong u President ba rangbah ka KSU, U Bah Lambokstar Marngar.
U Bah Lambokstar Marngar, u la kren ia kitei ki kyntien ban kynnoh pyrshah ia ka Infiltration Check Gate ha Byrnihat, ba ka dei ka snat kaba ym treikam satia, ka dei ha ka jingwan hiar hynnin ka sngi, da ka kynhun seng KSU, ban buh syndon da ka ILP Check gate ha 20mer, na ka bynta ban pyrshah halor ka jingshim sting ka sorkar jylla ban iakhun pyrshah na ka jingwan rung kynthep ki briew kiba na shabar sha ka jylla Meghalaya.
Da kaba kynnoh, ba katei ka Infiltration check gate ha Byrnihat, ka dei tang ka shynrong khlem jabieng bad ruh ka briew khlem ka bniat, u Bah Lambokstar Marngar kum u President ba rangbah ka KSU ha ka jylla, u la kren siat ia ka sorkar, kaba khein sting halor ki kam ban iakhun pyrshah na ka jingwan rung kynthep ki briew kiba na shabar sha ka jylla.
U la ong ruh ba la sakhi ba ka jingdon katei ka Infiltration Check gate ha Byrnihat kam da treikam satia ban ia khun pyrshah ia ki briew ba wan rung beian sha ka jylla bad kumba la lap bad sakhi da ka seng la ong, ba lada wan ki Kali na shabar la shu tba tang da ka Torchlight khlem da tohkit bniah ia ki kot ki sla bad nalor kata la shu kynnoh pat ba ki duna ki nongtrei.
“Lada ka sorkar ka don hi ka mon ban iakhun pyrshah ia ki jingwan rung beain ki briew kiba na shabar sha kane ka jylla, ka la dei ban ai da ka jinghukum kaba tyngeh, ba ki nongtrei ki dei ban shim khia bad ym ban buh ia katei ka khyrdop tang ban pyni sha ki paidbah ba ki tehlakam ia ka jingwan rung tuh ki briew kiba na shabar sha kane ka jylla” ong u Bah Lambokstar Marngar.
U la bynrap ruh da kaba ong, ba kine ki jingtlot ban ia khun pyrshah ia ka jingwan wan rung ki poi wir ki poi hap sha kane ka jylla, la hap ban kynnoh ia ka sorkar, namar dei ka jingkhein sting ka sorkar ba pyntreikam hok ia katei ka Infiltration check gate bad ruh wat ka Facilitation centre ha Umling ruh ka la kylla ingjah.
Shuh shuh, u la pynpaw ruh ba ka sorkar kam don ia kata ka mon ban ia khun pyrshah na ka jingwan rung ki poi wir ki poi hap sha kane ka jylla bad dei namar kane ka daw wat ka ain ba la don jong u snem 2016 kam pyntreikam, namar ba ka kwah ban pdiang sngewbha ia kita ki poi wir ki poi hap ban wan rung beain sha kane ka jylla, u la bynrap.
