U Dribar jong ka JCB bad uwei uba ieng hajan ka JCB mynta ka sngi ki la duh noh ia la ka jingim, kaba dei na ka jingwan tynrah kynsan kawei ka Trok ia katei ka JCB kaba pynieng harud ka surok, ba hap ha Khapmara hapoh ka surok Shillong By-pass ha Ri Bhoi District.
Kine ki 2 ngut ba la khlad noh ki kynthup ia u Dirbar ka JCB ba la tip kytreng kum u Batilem Suting (28) na ka shnong Langkyrdem, East Khasi Hills bad uwei pat la tip kyrteng kum u Slibor Kharbani (25) na ka Shnong Nongdom Umiap, Nongstoin, West Khasi Hills.
Kumba la ioh lum jingtip na u heh pulit ka Ri Bhoi, la ong ba kane ka jingjia, ka la jia mynta ka step ha ka por 3.30 baje mynstep, ha kaba kawei ka Tata Truck kaba don ia u number BR. 06 GE 5655, katba ka dang wan na Guwhati ban leit sha Lad Rymbai ha Jaintia Hills bad hadien ba la poi ha Khapmara ka la tynrah kynsan ia ka katei ka JCB kaba don ia u Number ML 05 W 1708 kaba pynieng harud ka surok, ba kitei ki ar ngut ki la mynsaw jur bad ki la khlad noh hadien ba la poi ha CHC Bhoirymbong.
Na ka liang ki bor pulit, ki la phah ruh ia u A. Boro kum u SI ban leit tohkit halor kane ka jingjia bad hadien ba la poi ha katei jaka, la lap ba kitei ki ar ngut ki la mynsaw bad la pynkit noh mardor ia ki sha CHC Bhoirymbong lyngba ka Ambulance 108 bad dei hadien ba la poi katei ka jaka ai jingsumar, ba la pynbna da ki Doctor ba kitei ki 2 ngut ba mynsaw ki la khlad noh na ka jingjur ka jingmynsaw.
Ka tyllong khubor na ki Pulit la ong ruh, ba u Dribar katei ka Trok, u la phet krad na katei ka jingjia bad kim pat tip ruh wat ia ka kyrteng bad ka jaka shong jaka sah jong, ha kaba haduh mynta ba ki dang pynlong ia ka jingtohkit.
Shuh shuh, la ong ruh ia kitei ki 2 ngut ba la khlad noh, la rah sha Civil Hospital Nongpoh ban pyndep ia ka postmortem examination, kaba dei hadien ka jingtohkit bniah na CHHC Bhoirymbong. La ong ruh ba ia kitei ki Kali ka Tata Truck bad ka JCB la kurup noh da ki bor Pulit bad ki pulit ki dang pynlong ia ka jingtohkit kaba kham bniah halor kane ka jingjia. Na ka liang ki bor pulit ki la pyntip ruh sha kiba haïing jongkitei ki 2 ngut ba la khlad noh bad la bthah ia ki bahaïingba kin wan sha PIC Khapmara na ka bynta ban leh katkum ki kyndon jong ka ain, ong ka tyllong khubor ba la ioh lum na ki Pulit ka Ri Bhoi.
KHLAD 2 NGUT NA BA TYNRAH KYNSAN KA TROK IA KA JCB BA PYNIENG HARUD SUROK HA KHAPMARA
