Haba leit ban shim bynta haka jingpynhap pyrda noh ïaka Wisdom Week jong ka Wisdom Centre kaba don haka shnong Umdihar kaba dei kawei naki shlem ban sumar bad syllok ïaki samla bala ngop bad kyrni haki jingdih buaid khamtam u drok, u Bah Brighstarwell Marbaniang MLA ka Mawlai u la ai ka jingïaroh ïa u trai katei ka Wisdom Center u Pastor David Jamir watla u dei u riew shimet hynrei u don ka mynsiem ban sei ïaki samla kiba la hap bad ngop haki jingdih buaid.
Kum uwei naki nongmihkhmat paidbah u Bah Bright u la pynpaw ka jingsngewkhia halor ka jinglong jingman jong ka jylla namar ka jingjyllei jong ki briew kiba la kyrni ha drok bad ki kam sniew kam smeh bad katkum ka jingtip ba u la ioh lum ha kine ki khyndiat sngi ki don kumba 2.5 lakh ngut ki samla kiba la ngop ha u drok haka jylla bad kitei kiba ngop ki dei beit kiba bun na Ri Khasi bad Jaiñtia bad ki kham duna sha Garo Hills.
U la pynpaw ruh ka jingsngewtynnad ban poi sha katei ka jaka namar ka dei ka jaka kab kham pher kaba buh ïa u Blei hakhmat bad khmih lynti ba katei ka shlem kan long ka jingkyrkhu ïa kiba bun ki samla kiba kwah ban lait naka jingshah teh mraw ha u drok namar lehse hadien ba kila mih na katei ka jaka kin long pat ki nongrah khubor ïa kiwei pat ha ka imlang ka sahlang.
Ha kawei pat ka bynta u Bah Brighstarwell u la kren bynñiaw lada u riew shimet marwei u lah ban leh kat katei ka kam bakhraw u dak jingkylli ba heh ruh u don ïaka sorkar namar kum kitei ki jait jaka ai jingsumar bad syllok ïa kiba la kyrni haki jingdih buaid (Rehabilitation Centre) ka sorkar kala dei ban phaikhmat ban buh ha kane ka jylla ym ban ap tang ha ki riew shimet ban sdang namar kumba long mynta ki u drok u la long kum ka jingpang haka jylla bad palat 2.5 lakh ngut ki samla kiba la ngop ha utei u jingdih buaid.
U la ong ruh ba ka sorkar ka dei ban shimkhia ïa kane ka kam la ka long ha kano kano ka rukom ban buh bad ban thaw ïaki jaka sumar bad syllok ïakiba la kyrni ha u drok bad ki jingdih buaid ban pynkylla dur biang ïaka jingim jong ki samla bad ka imlang ka sahlang kaba lait na u drok.
