Na ka bynta ban pynbha bad ban ai ka jingshakri kaba paka na ka bynta ka koit ka khiah ki paidbah ha West Khasi Hills District, ka KSU, West Khasi Hills District, ha ka jingiakynduh ba dang shen ia ka myntri ka tnad ka koit ka khiah, ka Dr. Mazel Ampareen Lyngoh, ki la aiti syndon da ka dorkhas bad ruh ban pynpaw halor shibun ki mat ki jura, ba kum ka seng ka kyrpad ia ka myntri ban phai khmat sha West Khasi Hills na ka bynta ban kyntiew ia ka koit ka khiah ki paidbah.
Ha ka jingiakynduh ia ka Myntri bad ruh ba la aiti ia ka dorkhas, ka seng KSU ka la ban jur ban weng ia ka jingeh na ka jingduna ki nongtrei, bad pynpaw ruh ki don palat 30 tylli ki kam ba dang lait ha kylleng ki jaka ai jingsumar ha West Khasi Hills, ba dei ban thung kam noh Mordor, khnang ba kan nym wan rah jingeh ia ki paidbah kiba ju mad jingeh na ka daw ka jingduna ki nongtrei ha ki jaka ai jingsumar.
Ka seng ha katei ka dorkhas, ka la pynpaw ruh ba ka jingthungkam ruh ka dei ban long kaba khuid kaba suba bad dei ruh ban pynbna paidbah ia ki kam ba dang lait bad ia ki kam ba thung sop sop na shadien ruh dei ban pynlong ia ka jingtohkit, khnang ba kan long ka jingmyntoi na ka bynta ki samla wad kam wad jam ba kin ioh ia ka kam katkum ka jinglah jong ki, ha ki examination wad kam.
Kawei ruh na ka mat ba ki la buh, ka dei halor ka jaka jingsumar ba 50 jingthiah ba la tip kum ka MCH Hospital ha Nongstoin, kaba la pynsahteng la slem bad na ka liang ka seng ka la dawa jur na ka myntri ba dei ban plie paidbah bad ban pyntreikam noh, khnang ba kan ai shisha ka jingmyntoi na ka bynta ki Longkmie ba armet bad ruh na ka bynta ki khunlung ki khynnah kiba ba pang ba shitom.
Ka seng KSU, WKHD, ka la pynpaw ruh ba ka jingpynbha ia ki jaka ai jingsumar paidbah ka long kaba donkam eh hakhmat ba dei ban shim khia da ka sorkar jylla bad ki la pynpaw ruh ba la donkam ban kyntiew kyrdan noh ia ka Maweit Public Health Centre (PHC) sha ka Community Health Centre (CHC), namar ka jingbun briew ba la shakri da kane ka PHC la donkam ba n ioh noh da ka kyrdan CHC. Ka seng ka la kyntu ruh ban kyntiew kyrdan ia ka Nongkynjang Sub-Centre sha ka PHC, kaba dei kawei na ka projek ba la mang pisa bad ba la dep ban buh mawnongrim da ka sorkar, ha kaba haduh mynta ka dang sahteng.
Shuh shuh, ka seng ka la pynpaw ruh hakhmat ka myntri shaphang ki 15 tylli ki Projek, kiba dei shaphang ka koit ka khiah, ha kaba mynta ka dang iaid shakhmat bad ba ki paidbah ka West Khasi Hills kiba dang ia kynduh jingeh. Ka seng ka la pynpaw ruh ka jingsngewkhia, halor ka jingpynslem ia kine ki projek namar kane ka ktah ruh ia ki paidbah ba kin nym ioh ia kata ka jingsumar kaba paka kumba la angnud ka sorkar, bad khamtam kane ka projek ka dei ban ai jingmyntoi sha kiba bun ki shnong nongkyndong.
