Hapdeng ki ummat bad ki jingsngewsih kthang halor ka jingduh nong ia uwei na u riewniam ka Balang Katholik, u Bishop George Mamalaserry, uba la khlad noh ha ka 5 tarik u Naitung 2024, ki paidbah riewngeit ka Balang Katholik ha Garo Hills mynta ka sngi kin sa pyndep noh ia ka jingleh niam kaba khatduh bad ruh ka jingleh burom ba khatduh ia ka met ba dang sah jong u, ka ban sa sdang na Sacred Heart bad kin pynkut ha ka Iingmane Cathedral, Tura.
Kum ban pynkynmaw, u Bishop Goerge Mamalassery, u dei u bishop ba nyngkong eh ha Garo Hilla bad kum u nongsharai Balang, u dei uwei na u riewniam uba la noh synniang ym tang ban pynkhlain ha ka jingim ba kynja mynsiem bad ruh u la don ka bynta kaba khraw bha ban kyntiew ia ka roi ka par ki paidbah ha Garo khamtam ha kaba kyntiew ia ka koit ka khiah bad ruh ia ka pule ka puthi.
U Bishop George Mamalassery, u la khlad noh ha ka rta kaba 92 snem,hadien ka jingshah sumar ha Holy Cross Hospital ha Tura bad namar ka jingban ka jingshitom u la leit noh sha la U Trai ha ka janmiet jong ka 5 tarik u Naitung 2024, ha katei ka jaka ai jingsumar kaba don ha sor Tura.
Kumba la sakhi mynta ka sngi, ka jingleh niam ba khaduh ia une u Bishop George Mamalassery ka la dang iaid shakhmat bad nalor ki riewniam naduh ki phadar bad ki sister bad la iohi ruh da ka jingwan iashim bynta lang u Myntri Rangbah ka jylla, u Conrad K Sangma nalor kiwei kiwei de ki myntri sorkar ryngkat bad ki hajar ki paid riewngeit ka Balang Katholik kiba la tuid sha kane ka jinglehniam ban pyndonburom khatduh ia une u riewniam.
