Ki pulit jong ka jylla Manipur ha ryngkat ka jingiatrei lang bad ka kynhun jong ka Central Reserve Police Force (CRPF) ha ka step phyrngap mynta ka sngi, ki la pynlong ia ka jingkhynra ha kawei ka shnong kaba dang hap hapoh ka jingkhmih jong ka New Keithelmanbi Police Station jong ka Kangpokpi District ka jylla Manipur, kaba la poi ruh shaduh ka jingiasiat hapdeng ki bor pulit bad ki lehnoh kieng atiar.
Katkum ka tyllong khubor na ki bor pulit ka jylla Manipur, la iathuh ba kane ka jingleit khynra, kadei ha ka por kumba 3:30 baje mynstep hadien ka jingioh ia ka jingtip kaba thikna na ki bor syntiat jong ka National Investigation Agency (NIA).
Ha katei ka jingiasiat bad ki bor pulit, lai ngut ki lehnoh kieng atiar kiba la tip kyrteng kum u Thangjoel Haokip ba ju khot sin u Thangboi, u Jangjoulen Khongsai ba ju khot sin u Goulen bad u Jangminlun Singson ba ju khot sin kum u Franky ki la shah kem noh.
La iathuh ruh ba kitei ki laingut kiba la shah kem noh, kidei kiba la donkti ha kiba bun ki kam pyntriem ha ki por kiba lah dep bad na ka met jongki, la ioh ban kurup ia ar tylli ki suloi AK, kawei ka suloi MA1 MK-3, kawei ka suloi SBBL bad kumba 1382 tylli ki jait kuli bapher bapher.
Ki bor pulit ka jylla Manipur ki la iathuh ruh ba ia kitei ki lai ngut ki lehnoh kieng atiar kiba la iohkem ryngkat bad kitei ki tiar siat, la aiti noh sha ka NIA na ka bynta ban shim ia ki sienjam katkum ki kyndon jong ka ain bad pyntip ruh ba ki bor pulit, ha katei ka jingkhynra, wat hapdeng ka jingther kuli jong kitei ki lehnoh kieng atiar, ki la ialeh katba lah ban nym pynjur ia jingiasiat namar ka jingdon jong ki ‘riew paidbah.
Shuh shuh, ki bor pulit ki la iathuh ruh ba ki la don shibun ki jingkynnoh ki bym shong nongrim bad kiba pynshit kiba la saphriang ha ki lad social media halor katei ka jingkhynra, bad kyrpad ia ki paidbah ba kim dei satia ban pynsaphriang ia ki khubor lamler bad maham ruh ba kito kiba donkti ban pynsaphriang ia ki khubor lamler, kin sa ngat ha ki kyndon jong ka ain.
