Ki nongialam jong ka Khun Hynniewtrep National Awakening Movement (KHNAM) State Youth Wing, mynta ka sngi ki la byrngem ban khang tala ia ka Laundry Department jong ka North Eastern Indira Gandhi Regional Institute of Health & Medical Science (NEIGRIHMS) kaba don ha Mawdiangdiang, lada ki bor ba dei khmih katei ka hospital, kim weng ia ka contract jong u Abhishek Singhania hapoh ka 24 kynta.
Haba kren sha ki ladpathai khubor, hadien ka jingiakynduh bad ki bor pyniaid ka NEIGRIHMS, u President ka KHNAM, State Youth Wing, u Bah Erickton Swer u la iathuh ba ka jingwan ban ban kynduh ia ki bor pyniaid ka NEIGRIHMS ka long ban phah weng ia ka contract jong u Abhishek Singhania u ba ioh ban pyntrei ha ka Laundry Department jong kane ka hospital khlem ki kot ki sla kiba biang.
Utei u nongialam, u la iathuh ruh ba ha kine ki khyndiat bnai, ka NEIGRIHMS ka la khot ia ka tender thymmai, bad ki la don shibun ruh ki trai jylla kiba thep ia katei ka kam, hynrei katei ka hospital ka ai ia ia katei ka kam ha u Abhishek Singhania, u bym don wat ia ka Trading License ban pyntrei ia katei kam jong ka tnad Laundry katei ka hospital.
U la iathuh ruh ba ka seng ka la dep ban kynduh ia u Deputy Director, Administration jong ka NEIGRIHMS ban ia kren halor kane ka mat, da kaba dawa ruh ba ki dei ban weng mardor ia u ka kontrak kaba la ai sha u Abhishek Singhania namar ba u pyntrei khlem ki kot ki sla ba biang. Utei u Deputy Director, Administration ka NEIGRIHMS u la kular ban shimkhia ia kane ka kam hapoh ar bnai.
Nalor kane ka seng ka la leit ruh sha ka KHADC ban kyntu ban ym pynlait ia ka Trading License sha utei u Abhishek Singhania halor ka nongrim ba ki bun ki trai jylla ki ba lah ban pyntrei ia kane ka kam, hynrei mynta la lai bnai kynthih, kam shym la don satia ka jingshimkhia la kadei na ka liang ka NEIGRIHMS ne na ka liang ka KHADC, la iathuh utei u nongialam.
Shuh shuh, utei u nongialam ula byrthen ruh ba ka seng kan sa ujor da ka ejahar pyrshah ia ka NEIGRIHMS halor ka jingpynkhein ia ka kyndon ain Trading by Non-Tribals jong ka KHADC.
