Ki bor pulit ka Ri Bhoi District, hadien ba ki la ioh ban kem dang shen ia ki saw ngut, kiba la suba ba ki dei ki dkhot ka HNLC na Ri Bhoi District, kiba kynthup ia u Cyfrank Paul Pariat, U Kitbok Mujai, u Barnabas Lyngdoh bad u Wanpynshngain Dympep bad mynta ka sngi pat da ka jingbuddien bad ka jingiaid tohkit bniah, ki la ioh ban kem sa ia uwei u suba dkhot HNLC ba la shah kynnoh kum u nongiarap ka kynhun HNLC.
Une u suba dkhot HNLC ba la shah kem mynta ka sngi, la tip kyrteng kum u u Sanborlang Rapsang, 38 snem ka rta na Mawlai, Umjajew, East Khasi Hills, uba la shah kynnoh ruh ba u dei uba la donkti ban pynbit pynbiang ia ka leit ka wan jong ki dkhot seng HNLC kiba leit shah hikai pyntbit sha ka ri Bangladesh.
Katkum ka kyrwoh khubor ba la phah da u Superintendent of Police ka Ri Bhoi, u Jagpal Singh Dhanoa, u la pynpaw ba la ioh biang ban kem ia une u suba dkhot HNLC, ka dei hadien ba ki bor puulit ka Ri Bhoi ki la bteng ia ka jingtohkit bad ka jingbuddien katkum mukotduma ha Umiam Police Station katkum ka case No. 46(06)2024 hapoh ki kyndon 120B/506/384/511 jong ka Indian Penal Code (IPC) lem bad ki kyndon 10/13/17/18 jong ka ain Unlawful Activities (Prevention) Act.
Halor kane ka jingshah kem utei u Bah Sanbor Rapsang, kadei hadien ka jingtohkit ia u Bah Cyfrank Paul Pariat, uba la phla ba u la leit shah hikai pyntbit sha Bangladesh bad u Bah Kynsaijun Thabah, kumba shi bnai ei ei ha bnai Naitung 2023 bad dei ha ka shiteng bnai jong u bnai Nailar 2023, ba ki la wan phai biang sha la ïing.
La ong ruh ha ka jingtohkit kaba bniah ha ka 5 tarik u Naitung 2024, u Bah Kynsaijun Thabah, u la shah kem ha ki bor pulit ka Ri Bhoi bad ha ka jingtohkit bniah na u, u la phla ba u dei u dkhot ka HNLC bad iathuh ruh ba u la leit ban shah hikai pyntbit ryngkat u Bah Cyfrank Paul Pariat ha kitei ki bnai jong u snem 2023.
Shuh shuh, la ong ruh ba katkum ka jingtohkit, u la phla ruh ba u Sanbor Rapsang, u dei uba iarap jar jar na ka bynta ban ioh lad ban leit shah hikai sha Bangladesh ha u snem 2023 bad mynta ka sngi u Bah Sanbor Rapsang, u la shah kem noh ha ki Pulit ka Ri Bhoi bad ka jingtohkit kaba bniah ka dang iaid shakhmat ban lapdien shuh shuh sa ia kiwei de kiba donkti, ong ka kyrwoh khubor na u Heh Pulit ka Ri Bhoi District.
