U Bah Eric Swer, President lem bad u Bah Melamshwa Lyngdoh Mawphlang, Assistant General Secretary jong ka seng Khun Hynniewtrep National Awakening Movement (KHNAM), State Youth Wing mynta ka sngi ki la leit ban ujor da ka ejahar ha Mawdiangdiang Police Station pyrshah ia ki bor pyniaid jong ka North Eastern Indira Gandhi Regional Institute of Health & Medical Science (NEIGRIHMS) halor ka jing bym weng ia ka kontrak kaba la ai sha u Abhishek Singhania kaba kum ka seng ka la dep ban ai por 24 kynta, hynnin ka sngi.
Kum ban shu kdew, u Bah Eric Swer, ha ka 10 tarik mynta u bnai Naitung u la byrngem ban ai da ka ejahar lada ki bor ba dei khmih ka NEIGRIHMS kim weng ia ka kontrak kaba la ai sha u Abhishek Singhania ha kaba iadei bad ka kam thung nongtrei ha ka tnad Laundry Service jong katei ka jaka ai jingsumar hapoh ka 24 kynta.
Hadien ba la kut katei ka jingaipor, u Bah Eric Swer, President lem bad u Bah Melamshwa Lyngdoh Mawphlang, mynta ka sngi ki la pyndep ia katei ka kam, da kaba buh ia ka ejahar pyrshah ia ki bor pyniaid ka NEIGRIHMS ha Mawdiangdiang Police Station halor ka ka jingbym lah ka jongki ban weng ia katei ka kam kontrak kaba la ai sha utei u Abhishek Singhania, wat hadien ba ki la ioh jingtip ba um lah stia ban pynbiang ia ki kot ki sla kiba iadei bad ka Trading License na ka Khasi Hills Autonomous District Council (KHADC).
Ha ka ejahar kaba la thoh sha u Officer In-Charge jong ka Mawdiangdiang Police Station, kitei ki nongialam jong ka KHNAM, State Youth Wing, ki la thoh ba ka NEIGRIHMS ka la dep ban pynmih ia ka tender ban thepkam na ka bynta ban pynbiang ia ki nongtrei ha ka tnad Laundry Service jong katei ka jaka ai jingsumar, kaba la ioh da utei u Abhishek Singhania, u trai jong ka kompani RGF, uba khlem don ia ka laisen katkum ka kyndon ba lai jong ka ain Trading by Non-Tribal Regulation, 1954 ka Khasi Hills Autonomous District Council (KHADC) bad kaba pynkhein ruh ia ka Para 2 jong ka Notification kaba la pynmih da ka District Council Affairs Department katkum ka No. DCA.36/91/323, kaba kren shai ba ymdei ban ai kam ia kino kino ki seng, ki kontraktor bad kompani bar jylla bad kiwei kiwei de kiba khlem biang ia ki kot ki sla.
Lyngba katei ka ejahar, u la pyntip ruh ba ka seng KHNAM, State Youth Wing, ka la dep ban kynduh ia u Deputy Director of NEIGRHMS ha kine ki lai bnai ba lah dep, ha kaba utei u ophisar ka NEIGRIHMS, u la kular ban weng ia katei ka kontrak kaba la ai sha u tei u Abhishek Singhania lada um lah ban pynbiang ia ka Trading License, bad pyntip ruh kumba long haduh mynta, utei u Abhishek Singhania um pat don satia ia ka Trading License kaba pyni ruh ba ki bor ba dei khmih ka NEIGRIHMS, ki la pynkhein ia ka kyndon ain Trading by Non-Tribal Regulation, 1954 katkum ka Notification No. DCA.36/91/323 jongka tnad District Council Affairs ka sorkar jylla.
Halor katei ka jingshisha kaba ki la kdew haneng, kitei ki nongialam jong ka KHNAM, State Youth Wing ki la buh jingkyrpad sha ki bor pulit ba ki dei ban shimkhia mardor bad leh ia kaba donkam katkum ki kyndon jong ka ain pyrshah ia ki bor pyniaid ka NEIGRIHMS kiba la iaid lait ia ki kyndon kiba la buh da kaba KHADC bad ka sorkar jylla.
