Ka KSU Mairang Circle bad ka KSU Nongkhlaw Circle, da ka jingiatrei lang ki la pynlong ia ka jingkhynra naphang ia ki bar jylla, kiba wan trei beain ha ka thain Eastern West Khasi Hills ha ka sngi Palei jong ka taiew.
Ha kane ka jingleit khynra la ialam da u Samla Rangshai Ryntathiang president KSU Nongkhlaw circle bad U samla Robin Nongrem General secretary ka KSU Mairang Circle bad la ia synrang lang da ka jingdon lang kiwei ki nongialam bad ki dkhot kitei ki ar tylli ki circle.
Ha kane ka sngi, ki nongialam ka KSU, ha ka jingleit khynra ha ki thain Nongkhlaw, ki la ioh ban bat 26 ngut ki nongtrei bar jylla kiba wan bylla ha katei ka thaiñ bad napdeng kitei ki 26 ngut, 2 ngut ki dei kiba ym don kot don sla satia.
Ki nongialam seng ki la bteng ruh ka jingkhyra sa ha ka thain Mairang, ha kaba ka seng ka la ioh ban bat 7 ngut ki bar jylla, kiba wan trei bylla ha Tirot Memorial hospital Mairang. Ka seng ka la ju leit jurip ruh na ka por sha ka por bad la maham ia u contractor ban pynbiang iaki kot ki sla jong ki bar jylla ba wan trei ha katei ka kam. La ong ruh ba ka Seng kala leit jurip khatduh ha 12tarik bnai jymmang 2024 bad ruh kala aipor ba dei ban pynbiang iaki kot ki sla hapoh 2 taiew hynrei ka jing leh mynthi jong u contractor kala pynlong iaka Seng ban beh shi syndon ia kine ki nongtrei bar jylla ki bym shym la pynbiang ia ki kot ki sla.
Shuh shuh, ka kyrwoh kaba shai na ka liang ka KSU Mairang bad Nongkhlaw Circle, ka long ba kin dang iai bteng ban pynlong ia ka jingkhynra naphang ia ki mynder kiba wan trei sha katei ka thain khlem da don ki kot ki sla bad na ka liang ka seng ka la kyntu ruh ia ki nongialam shnong ba kin ia snoh kti lang bad ka seng na ka bynta ban khanglad ia ka jingwan bylla beain ki bar jylla sha katei ka thain.
