Ka Northeast Space Application Centre (NESAC), Nongsder, Umiam mynta ka sngi ka la pynlong ia kata ka jingrakhe ba la tip kum ka ‘National Space Day’ ha Ri Bhoi District, kaba long shi bynta ban ai jinghikai shaphang ki jingiohmyntoi, kiba ngi lah ban pyndonkam ia ki kor ki bor ha ki haw haw jong ka sahit bneng.
Ia kane ka jingrakhe ia ka National Space Day la pynlong ha District Library Hall, Nongpoh, ha kaba la wan ban shim bynta da u Dr. Joram Beda, IAS bad Commissioner Secretary ka sorkar Meghalaya kum u kongsan bad la sakhi lang ruh da ka jingdon u Deputy Commissioner ka Ri Bhoi, U Abhilash Baranwal, u Dr. S.P Aggarwal, Director ka NESAC bad kumjuh ruh ki khynnah skul na ki skul bapher bapher ka RI Bhoi lem bad ki ophisar sorkar.
Kum ban pynkynmaw, ia kane ka National Space Day la hap ban rakhe man la u snem, hadien ba ka India ka la lah ban pynhiar ïa u Chandrayaan-3 Vikram jong ka sha ka lunar south polar region ha ka 23tarik Nailar 2023. Ban kynmaw burom ïa kane ka kam jong ka jingjop, man u snem ïa ka 23 tarik August la pynbna kum ka “National Space Day” da ka Sorkar India.
Haba ai jingkren ha kane ka sngi kum u kongsan, Dr. Joram Beda, u la pynpaw ia ka mynsiem jong ka jingkmen ban ioh don bynta lang ha kaba rakhe ia kane ka National Space Day bad kane ka jingrakhe ia kane ka sngi kyrpang shaphang kita ki jingstad ba pyndonkam ia ki kor ki bor ha ki haw haw, ka long ka jingai mynsiem ia kiba bun ki samla pule ba kin ioh mynsiem ban leit pule kyrpang shaphang kane ka kam pule.
U la ong ruh ba ka ri India, ka dei kawei ka ri, kaba la shim khia bha kumno ban kyntiew ia ka jingstad kiba dei shaphang ki kor ki bor ba hap pyndonkam ha ki haw haw bad kumba paw, ka ri India ka dei kawei kaba dang sahdien lada ia nujor bad kiwei ki ri ka pyrthei kiba la iaid shaphrang ha ka jingstad jong ki kor ki bor ha ka haw, hynrei wat la katta hapdeng shibun ki jingiakhun bad ban ia khun, ka ri India ka la lah ban poi sha ka South Pole jong u Bnai.
Shuh shuh, ha kane ka sngi, nalor ki jingai jinghikai shaphang kata ka jingstad jong ki kor ki bor, kiba dei shaphang ki jingstad ban poi sha ki haw haw jong ka suinbneng, u Dr, Joram Beda u la ai mynsiem ruh ia ki khynnah skul, ba ki dei ban don kata ka jingangnud ban pyntbit ia lade ha kaba pule shaphang kita ki jingstad kaba ngi ioh jingmyntoi da ka jingdon ki haw bad kum ki samla pule ki dei ruh ban don ka thong ban long kita ki Space Scientist khnang ba ngin lah shuh shuh ban kyntiew ia ka ri ban paw shakhmat ha kaba ia dei bad ka jingpaw ha ka jingstad kiba ia dei shaphang ki haw haw.
