U Vice President jong ka kompani The Hindu Group, u Sridhar Aranala u la ong ba ki kotkhubor kin iai neh namar iaki lah ban shaniah khamtam ha kane ka juk kaba bun satang ki khubor lamler ha ki rynsan jong ka internet lane kita ki ‘digital platforms.
U Sridhar Aranala u la kren ia kane ha ka jingialang kaba kyrpang jong ki samla pule ka University of Science and Technology Meghalaya (USTM) halor ka phang ‘Role of Media in Building Future Dynamic Professionals’ lane ka bynta jong ki lad pathai khubor ban tei ia ki nongtrei kiba tbit lashai lashisngi.
U la pynpaw ruh ba katkum ka jingwadbniah jong ki ‘riewshemphang, la shem ba ki kotkhubor ki long kaba ai jingmyntoi khamtam ban ioh ia ka jingsngewthuh kaba paka, katba ki rynsan internet lane kita ki ‘digital platform’ bunsien ki ialam sha ka jingthut bad ka jingtlot ia ki briew.
Su Sridhar Aranala u la batai pynshai ruh halor shibun ki jingmyntoi ba ki samla pule ki lah ban ioh lyngba ki kot khubor naduh ka rukom pule, rukom thoh, ka jingpyniar ia ka jingnang jingtip, ka rukom pyrthat pyrdain bad ruh ka jingshemphang ha ka imlang ka sahlang.
U la ai jingmut ruh ia ki samla pule ba kidei ban phaikhmat kyrpang halor ka jingthmu ka jongki, ba kin trei shitom bad lehbha ia katei ka jingpyrshang ka jongki bad khamtam eh ba kin buh hakhmat ia ka jingpule ban ia ka kam pynsngewbha. U la ong ruh ba ki lad pathai khubor, ki iarap ban kyntiew ia ka bor pyrkhat pyrdain bad ruh ia ka jingkiew ha ka kam.
U la ong ruh ba ka jingstad jingshemphang donkam ban pynsaphriang iaka ha rukom kaba dei bad kaba bha da kaba bynrap ba ha ka jingim, bunsien ngi dap da ka jingkwah ban tip bad tohkit ia kiei kiei kiba phylla.
Ha kane ka sngi, u Sridhar Aranala u la batai ruh halor ki bynta jong ka rukom pynmih kotkhubor bad kyntu ruh ia ki samla kiba kwah ban long ki nongsengkam lane kita ki ‘entrepreneur’ ba kim dei ban thawlad ban ioh ia ki nongthied ym ban long tang u nongthied.
