Ka Synjuk ki Rangbah Shnong Ri Bhoi District mynta ka sngi ka la leit syndon ban kynduh ia u Deputy Commissioner ka Ri Bhoi District, na ka bynta ban kyrpad ia ka bor synshar district bad ruh na ka sorkar ban buh noh kawei ka jaka ai jingsumar, na ka bynta kito ki samla kiba kyrni bad ngop ha u drok.
Haba leit ban kynduh ia u Deputy Commissioner ka Ri Bhoi, la ialam da u President ka synjuk, u Bah B.B Makdoh bad la synran lang ruh da ka jingdon lang ki dkhot, kiba la pynpaw ba ha Ri Bhoi District la donkam ban don noh kata ka jaka ai jingsumar (Rehabilitation Centre) na ka bynta kito ki khun samla, kiba la ngop bad shah pynjot ha u drok.
Haba ia kren bad ki nongthoh Khubor, u President ka Synjuk ki Rangbah Shnong Ri Bhoi District, u Bah B.B Makdoh, u la ong ba ka synjuk, ka pynpaw ia ka jingkmen hadien ba la kynduh ia u deputy commissioner ka Ri Bhoi bad ka daw ka long ba kum u khliehduh ka District u la kloi ba iatrei lang na ka bynta ban ia khun pyrshah ia u drok, da kaba u la kular ban bu shwa shipor ha ïingwai ban long kum kata ka jaka ai jinghikai ne sumar ia ki samla ba la ngop ha u drok.
U la ong ruh ka daw kaba la pynlong ia ka synjuk ban ia kynduh ia u khliehduh ophisar ka Ri Bhoi, ka dei halor ka Nongrim ba la jyllei kita ki samla kiba la ngop ha u drok bad ha kine ki sngi la bun tang kita ki kam tuh kam thiem kaba la ktah ia ka shongsuk shongsain ki paidbah.
“Kum ka synjuk ka shim khia ia kane ka bynta, ka long kum ka jingangnud ba lada don kata ka jaka ai jingsumar kyrpang ia ia ki samla ba la ngop ha u drok, kan iarap shibun ia ki samla ba kin lait noh na ka tyrsim jingjot jong u drok bad kumjuh ruh kane ka long shi bynta ban ia khun pyrshah na ka jingkynrei jong u drok” ong u Bah B.B Makdoh.
Shuh shuh, ha kawei ka bynta, kumba la kular da u deputy commissioner ban buh shwa ia kata ka jaka ai jingsubar ba shipor lyngba ka ïingwai, ka synjuk kan ai ka jingiatrei lang bad ka bor synshar District bad ha kajuh ka por ruh ka khot ka wer ia baroh ban ia khun pyrshah na ka jingjyllei u drok, khnang ba bun ki khun samla ba lui lui ha ka District kin lait na ka tyrsim jingpynjot jong u drok, u la bynrap.
