Ka jingnang iai bteng jong ka aiom lyuir ha ka jylla Meghalaya hi baroh kawei na ka jingiai hap u slap, ka la pynshong synjor ia shibun tylli ki lum ki wah, ki dieng ki siej kiba don harud ki surok bah, surok shnong bad kiwei kiwei ki jaka bad buh jingma ruh ia ki paid nongleit nongwan, ha kum kane ka jingjia, ki paidbah nongleit nongwan lyngba u surok bah National Highway -06, ki la lait thaw na ki jingjia ba sngewsih hadien ka jingtwa kynsan u wei u lum ba don harud u ne u surok bad u wei u dieng bah u la khyllem beit hapdeng u ne u surok bad khang lynti syndon ia kawei ka liang jong u ne u surok NH 06 kaba la jia ha kawei ka shnong Pahamriñiai hajan Nongpoh, Ri Bhoi District.
Kane ka jingjia twa lum bad ka jingkhyllem jong u wei u diengbah hapdeng u surok bah National Highway 06 ka la jia ha ki por 4 shiteng eiei janmiet, hynrei donbok pat ba ha katei ka por kawei ka trok kaba kit mar ka la lait thaw na ka jingshah bhen ne mad jingjia ba sngewsih kumjuh ia ki paid nongleit nongwan lyngba u ne u surok bah ba pyniasoh ia ka Shillong-Guwahati bad kiwei kiwei ki jylla.
Ha katei ka jingjia, ki bor ka National Highway Authority of India (NHAI) lem bad ki bor pulit ka Nongpoh Police Traffic Branch ki la poi ha katei ka jaka ban pynkhuid bad pom ia u tei u diengbah ban weng ia ka jingdheng kali kaba la neh kumba shikynta eiei bad da ki hajar tylli ki kali ki la hap ban iaid na kawei pat ka liang bym dei (Wrong Side) namar ka jingdheng kali kaba la neh katto kane por.
Ka aiom lyiur bad ka jingiai bteng ban hap slap ha kylleng ki jaka jong ka jylla Meghalaya, ka la pynshong synjor ia shibun tylli ki lum ki wah ha kylleng ki jaka khamtam ha ki rud surok bah, rud surok shnong bad kiwei kiwei kumta la donkam kyrkieh ba ki paid nongleit nongwan bad ki nongshong shnong kin phikir hi dalade ialade ban iada na kino kino ki jingjia kiba sngewsih haba don ki jingtwa lum, khyllem ki dieng ki siej ne wat ki jingshlei Um ha kylleng ki jaka.
Lah ban kdew ruh, ba ki jingjia twa ki lum kiba don ha shilynter u surok bah National Highway 06 ha Ri Bhoi District ki la nang iai jia na kawei ka por sha kawei pat khamtam ha ki jaka ba kynthup naduh Ladlasharai, Umran, Umsamlem, Quiñine, Umling bad kiwei kiwei, ba ki nongleit nongwan ki dei ban da phikir bha khamtam ki nongñiah kali na u ne u surok bah NH 06.
