Ka State Council of Science, Technology and Environment (SCSTE) ka jylla Meghalaya mynta ka sngi, ka lah ban plie paidbah noh ia ka jingai jinghikai ba 10 bnai lynter ban ai jinghikai ia kumba 48 ngut ki samla pule kiba shah jied bad kiba la pyndep ia ka eksamin klass 12 jong ka lain saian kiba thmu ban leit pule doctor, ia kaba la ai kyrteng kum ka ‘Meghalaya Star 30: Guiding Aspirations for NEET/JEE Exams’.
Kumban shu pyntip, kane ka prokram kadei shi bynta ban pynioh lad ia ki samla pule ka jylla kiba thmu ban leit pule doctor da kaba ai iaki ka jinghikai kumno ba kin lah ban iakhun ia ka eksamin NEET/JEE ban ioh rung sha ki kolej bapher bapher ha ka ri ban leit pule doctor.
Kum ban shu kdew hangne, ka Meghalaya Star 30, kadei ka prokram ba kyrpang jong ka sorkar jylla kaba thmu ban ai jinghikai bad jaka sah ei sha ki samla pule ka jylla kiba la pyndep ia ka eksamin klass 12 ha ka lain saian na ka bynta ba kin pyntbit ialade ban iakhun ia ka NEET/JEE eksam ban ioh leit pule doctor ha ki kolej bapher bapher jong ka ri da kaba phai khmat kyrpang ruh ia ki samla pule kiba duna ha ka ioh ka kot bad kiba wan na ki thain nongkyndong.
Ha kane ka sngi plie paidbah ia kane ka prokram ha Nongsder, la wan ban iadon ryngkat ruh da ka SR Marak, Director jong ka SIRD, u Gunanka DB, Member Secretary jong ka SCSTE lem bad kiwei kiwei de ki heh ophisar bad ki samla pule ka jylla.
Haba kren ha kane ka sngi, kum u kongsan, u Prof (Dr.) Nalin Mehta, uba dei u Director jong ka North Eastern Indira Gandhi Institute of Health and Medical Science (NEIGRIHMS) u la ong ba ka jingleit pule doctor ka dei ka kam kaba khia thew bad kaba mynsaw, ba kiba thmu ban leit pule ia kane ka kyrdan kim dei ban shim sting bad pynlong kamkai.
Ka jingpule doctor kamdei satia ka kamkai bad kamdei satia tang ban long doctor lane kum u nongsumar, hynrei ban long ruh ha kajuh ka por kum u ki paralok, u nonghikai, u nongkdew lynti, u nongsneng u ba stad ia ki briew bad uba lah ban ai jingmut ia ki briew kiba wan shah sumar.
U Professor Mehta u la ong ruh ba ka jingleit pule doctor kam dei satia da ka jingpynbor jong ki kmie ki kpa, ki bahaing hasem lane ki paralok, hynrei kadei beit ban long na ka daw ba u ta ne kata kaba leit ban pule, ki dei ban don la kajong ka thong, ka jingkut jingmut nalade shimet.
Shuh shuh, u Prof Nalin Mehta, u la pynshlur ruh ia ki samla pule ba kidei ban long kiba don ka jingtip shaphang ki jingjia kiba manla ka sngi ha ka imlang ka sahlang nalor ki jingpule ki jongki, bad kyntu ba um kwah satia ban iohi ia ki doctor kiba long tang kum ki ‘niangbam kot’ naba ka kamram kum ki doctor kadei ym tang ban sumar, hynrei ban long ruh kum ki nongai jingmut, ki paralok, ki nonghikai, ki nongkdew lynti bad ki nongsneng kiba stad ia ki briew kiba wan shah sumar haki.
