Ki laiphew saw ngut ki samla kynthei bad shynrang na ka jylla ha ka shatri jong ka Meghalaya Pencak Silat Association (MPSA), ki la leit ban iashim mynta ha ka North East Pencak Silat Championship kaba la long ha Nongbah Guwahati ha ki tarik 12 haduh14 mynta u bnai Naitung, 2024.
Na kitei ki 34 ngut, ki la don 17 ngut kiba la ioh Takma, ha kaba ki la don 6 ngut kiba la ioh Takma Rupa bad 11 ngut ki la ioh ia ka takma rnong.
Ka Pencak Silat ka dei ka kynhun kaba don hapoh ka Meghalaya Martial Arts Federation (MMAF) bad ha ka por ba kitei ki samla ki leit iakhun sha Nongbah Guwahati, la islam da u Bah Thomas Rangthaluh, u rangbah uba la paw bha ha ka Martial Arts.
Kitei kiba la ioh Takma Rupa, ki kynthup ia ka Khymtimon Rympei, Mon mon Rabha. Mariawan Kassar bad u nangta sa laingut kiba na ri lum Garo, kiba kynthup ia ka Yuvraj D. Sangma bad ka Indoarbiushbirth N. Marak.
Kiba ioh khur ia ka Takma Rnong, kiba kynthup ia u Ferdinand Ranee, Shembha Rangthaluh, Kyrshan Ranee, Suzzan Shadap, Phyrnai Khymdeit, Benison Shadap, Teninia Marak, Banrilang Muktieh, Yubrah Marak bad ka Indonra.
Haba iadei bad katei ka nam bad burom, ia kaba la wanrah nam da kitei ki samla, na ka liang u samla Eric Calvin Ranee, General Secretary ka MMAF, u la ai khublei kyrpang ia ki rang bad ki thei ialehkai ba la mihkhmat na ka jylla halor ka jinglah jong ki ban wanrah ia ka nam ka burom ia ka jylla bad u la kitbok kitrwiang ia ki ba kin nang treishitom shuh shuh na bynta kiwei kiwei ki lympung ialehkai State Level, National and International Level.
